Коџа Мустафа Решит-паша познат и како Мустафа-паша Решит (13 март 1800, Истанбул – 17 декември 1858) – османски државник и дипломат кој бил голем везир (главен министер) шест пати. Имал водечка улога во покренувањето, изработката и прогласувањето на првите реформски хатишерифи познати како Танзимат ("Реорганизација").
Бил штитеник на својот вујко Испартали Али-паша и подоцна на државникот Пертев ефендија, Решид влегол во владина служба на рана возраст и постојано напредувал, во 1834 година станал амбасадор во Франција. Во текот на престојот во Западна Европа студирал француски јазик и западна цивилизација и развил пријателски односи со француските и британските државници. Ги поддржал прозападните реформи на султанот Махмуд II, кој го поставил за свој министер за надворешни работи.
Наследникот на Махмуд, султанот Абдул Меџит I, бил решителен да ја продолжи политиката на својот татко и на Решит му ја доверил подготовката на нови реформски мерки. Разработена во облик на хатишериф, оваа програма била прогласена на 3 ноември 1839 година. Со неа на отоманските поданици им се гарантирала рамноправност и сигурност на животот и сопственоста, без разлика на нивната раса и религија. Иако не биле спроведени сите реформи, Решит станал симбол на прозападните реформи. Меѓу 1839 и 1858 година двапати бил именуван за министер за надворешни работи и шест пати бил именуван за голем везир.
Решитовите реформи вклучувале укинување на трговијата на робови, воведување на нови кодекси на комерцијално и кривично право, како и реформи на административните прописи за да им се стави крај на непотизмот и купувањето на назначувањата. Ја поддржувал француската и британската политика и бил голем везир при избивањето на Кримската војна (1853 - 1856) [1].
Наводи
- ↑ Mustafa Reşid Paşa - Encyclopaedia Britannica
Надворешни врски
.svg){kind=small}
