Moldavië is 'n rippubliek in Oos-Europa tösse Roemenië en de Oekraïne, aon de Prut en de Dnjestr. 't Groetste deil vaan de bevolking is Roemeenssprekend, meh in 't noordoostelek deil, Transnistrië, leef 'n groete Slavische gemeinsjap. Dit deil heet ziech in de jaore negenteg aofgesjeie en is de facto oonaofhaankelek. Hoofstad is Chisinau, aander belaankrieke stei zien Briceni, Balti, Comrat, Cahul, Bender, Vulcanesti en Tiraspol.
Bestuurleke indeiling
Moldavië is in 32 raioane (ink. raion) verdeild. Tot 2003 gaof 't 'n aander indeiling, namelek in nege provincies.
Historie
In aw tije weurt Moldavië bevolk door de Daciërs. Umtot 't op 'n strategische plaots op de route vaan Azië nao Europa laog, woort 't mierder kiere binnegevalle, boe-oonder door 't Riek vaan Kiëv en 't Riek vaan de Gouwe Horde.
In de Middelieuwe waor Moldavië 'n groet prinsdom, wat boete 't huideg Moldavië ouch e deil vaan Roemenië umvatde. In de zestiende iew woort 't prinsdom sjatpliechteg aon 't Osmaans Riek, en vaanaof 1812 woort 't es gevolg vaan 't Tractaat vaan BoekarestRössisch oonder de naom Bessarabië. 't Westelek deil góng later in Roemenië op.
Nao d'n Ierste Wereldoorlog verklaorde Bessarabië ziech oonaofhaankelek vaan Rusland en vereinegde ziech mèt Roemenië. In 1940 bezat de USSR 't land es gevolg vaan 't Molotov-Von Ribbentropakkoord. 't Vörmde daan de Moldavische SSR. Nao 't oetereinvalle vaan de USSR perbeerde 't land ziech weer bij Roemenië aon te slete, meh e referendum in 1994 blokkeerde dat.