Socialismo[1] es un movimento politic de sinistra cuje disveloppamento moderne comencia essentialmente post le Revolution francese. In general, socialistas favorisa le instrumentalisation del stato pro avantiar le interesses de classes social subalterne.[2] Illo ha classicamente proposite le reimplaciamento del capitalismo per un nove systema economic in qual le publico[3] dirigerea le fortias economic productive in le interesse commun e de un maniera equalitari. Dunque un tendentia simplista confunde socialismo al nationalisation de fabricas; totevia, nationalisation es solmente un de plure tacticas verso le controlo public del economia – socialistas promove sovente le organisation e action syndicalista, le formation de cooperativas, participation operari in interprisas, taxation progressive, un salario minime etc. In le passato esseva in voga le creation de interprisas o colonias modello, varie manipulationes del systema monetari, le imposition de precios maxime, e altere mesuras hodie pauc promulgate. Socialistas extende sovente lor definition del «interesses» del classes non hegemonic extra le sphera economic:[4] provision de servicios public (education, sanitate, transportation public, habitation, assecurantia social...); promotion de pace e unitate international; feminismo;[5] opposition al feudalismo, racismo, colonialismo e apartheid; laicismo; e ecologismo, son totos frequentemente associate al socialismo. Naturalmente, iste positiones son nullemente universal a presso de socialistas.
Doctrinas socialista ha essite misse in practica per governamentos democratic e dictatorial, e de un maniera plus o minus celere. Duo variantes de socialismo devenite importante in le seculo 20, a saper le communismo e le social-democratia, son notabile pro lor divergentias de approche e ideologia. On pote grosso modo characterisar communismo como un socialismo revolutionari implementate per un stato a partito unic (sovente totalitari), e social-democratia como un socialismo reformista implementate gradualmente per un stato pluralista e democratic. Ultra iste duo categorias large, il ha existite alcun movimentos revolutionari democratic (como le movimento Total Revolution de J. P. Narayan in India) o reformista autoritari (como le «ideas napoleonie» de Napoléon III, qui se considerava como un socialista).
Partitos socialista, o de tradition socialista, son ben ancorate in le major parte de systemas multi-partitista del mundo (con alcun exceptiones importante como isto del Statos Unite). Plus de cento partitos de orientation socialista o social-democrate son assemblate in le International Socialista; altere, minus grande internationales existe alsi. Programmas assatis radical, characterisate como socialista per lor proponentes, ha essite implementate per le revolutiones russe (1917, directe per Lenin con le collaboration de Trotsky, Stalin, Bukharin...), chinese (1949, directe per Mao Zedong), cuban (1959, directe per Fidel Castro e Ché Guevara) e bolivarian (venezuelan, 1999, directe per Hugo Chávez), inter alteres.
Intellectuales socialista include Robert Owen, Henri de Saint-Simon, Karl Marx e Friedrich Engels, Georgi Plehanov, Eduard Bernstein, Antonio Gramsci, Rosa Luxemburg, Sidney e Beatrice Webb, Bertrand Russell, W. E. B. Du Bois, Albert Einstein, George Orwell, Jean-Paul Sartre e alteres.
Socialismo es traditionalmente symbolisate per le color rubie: le bandiera rubie, le rosa rubie e cocardas rubie son familiar emblemas socialista. Hymnos como Bandiera rossa, L'Internationale, Bella Ciao, Solidarity Forever, El Pueblo unido jamás será vencido, The Red Flag e La Marseillaise face parte del tradition socialista.
Referentias
- ↑
Derivation:
Entitates:
1. (it) Socialismo ||
2. (es) Socialismo ||
(pt) Socialismo ||
3. (fr) Socialisme ||
4. (en) Socialism ||
Controlo:
(de) Sozialismus ||
(ru) Социализм ||
- (Extra): (la) Socialismus
- ↑ Nonobstante, alcun anarchistas, como Noam Chomsky, identifica anarchismo como un «socialismo libertari» que oppone le existentia del stato, insistante que un revolution socialista debe esser effectuate per operarios mesme. Il ha totevia currentes anarchista que son capitalista o non-socialista.
- ↑ Definitiones del classe in favor de qual socialismo opera varia: le «populo» in general, proletarios, paisanos, parve burgesia, soldatos, studentes, le pauperes...
- ↑ Pro exemplo, sequente le reformator social William Beveridge, socialistas britannic post le Secunde Guerra Mundial tentava eliminar le cinque «Males Gigante» confrontante le classe operari: carentia, maladia, ignorantia, mal habitation e desempleato («want, disease, ignorance, squalor and idleness»).
- ↑ Sylvia Pankhurst es un exemplo de un feminista socialista britannic.
