Osnabrück (westfalsce Ossenbrügge) je wulkoměsto z něhdźe 157.000 wobydlerjemi na sewjerozapadźe Němskeje a sydło Osnabrückskeho wokrjesa kaž tež w lěće 780 załoženeho Osnabrückskeho biskopstwa. Nadeńdźe so něhdźe 120 kilometrow zapadnje Hannovera na juhu Delnjeje Sakskeje pod Teutoburgskim lěsom. Přez město wjedźe rěka Hase. Nimo toho je Osnabrück jako wažne industrijne stejišćo ze Srjedźozemskim kanalom zwjazany.
Hižo w srjedźowěku ležeše Osnabrück při křižowanišćo wažnych wikowanskich dróhow a hraješe tež wěstu rólu jako Hansowe město. Hač do dźensnišeho křižuja so w měsće wjacore železniske čary a awtodróhi A 1 (Hamburg–Köln), A 30 (Hannover–Nižozemska) a A 33 (směr Bielefelda).
