Valeriano Yepes Hernández de Madrid, nado en Novés (provincia de Toledo) o 14 de abril de 1925 e finado na Coruña o 29 de xullo de 2012, foi un enxeñeiro agrónomo español.[1]
Estudou Enxeñería Agrónoma en Madrid e posteriormente doutorouse en 1966.[1] Trasladouse a Galicia en 1951 onde traballou no seu campo. Iniciou campañas para amosar o uso de praderías artificiais, a construción de silos e o ensilado da herba en 1966. Destas campañas naceron as melloras realizadas nas explotacións gandeiras de Galicia.[1]
En 1969 é nomeado director do Centro de Investigacións de Galicia, organismo dende o que se concentrou na organización e difusión da investigación agraria. Este traballo culminouse coa creación do Centro Rexional de Investigación e Desenvolvemento Agrario en Mabegondo, e do que foi director ata 1983.[1]
O seu traballo foi recoñecido con diversas condecoracións, e en 1984 ingresou na Real Academia Galega de Ciencias como membro de número coa lectura do discurso Ideas sobre la investigación agraria.[1]
Casou con Magdalena Stork Gadea, e foi pai de María de los Ángeles, Ricardo, Silvia e Pablo Yepes Stork.[2]