O Racing 92 é un club francés de rugby con sede en Colombes (periferia de París) formado en 2001 como resultado da fusión dos históricos Racing Club de France (cinco títulos de liga) e US Métro. O nome orixinal do club era "Racing Métro 92", e foi reducido a "Racing 92" en 2015. O número "92" do nome fai referencia ó departamento de Altos do Sena no que está o estadio Ives-du-Manoir, que é o fogar do equipo. Ese departamento da rexión da Illa de Francia ten o número 92 na lista de departamentos de Francia. O recinto de xogo con capacidade para 14,000 seareiros foi construído en 1907 e foi a sede central dos Xogos Olímpicos de 1924. Está previsto que en 2017 se inaugure o novo estadio do club na localidade veciña de Nanterre, co nome Arena 92 e capacidade para acoller a 32,000 persoas.
Na tempada 2015/16 o Racing 92 chegou por vez primeira á final da Copa de Europa, caendo ante os Saracens ingleses por 21 a 9. Na mesma tempada gañou por 26 a 21 a final da Liga francesa na que se enfrontaba ó RC Toulon. Ese encontro foi presenciado no Camp Nou por 99,124 persoas, pasando a ser o novo récord mundial de asistencia nun partido de clubs de rugby.
Fundado en 1882 como Racing Club de France, foi un dos primeiros protagonistas do campionato francés de rugby, sendo de feito o primeiro campión en 1892. Naquela final venceu por 4 a 3 ó Stade Français, e o árbitro foi Pierre de Coubertin.
O club volveu a saír campión nos anos 1900, 1902, 1959 e 1990; e quedou subcampión nos anos 1893, 1912, 1920, 1950, 1957 e 1987.
A actual entidade deportiva naceu da unión da sección de rugby do histórico Racing Club de France e a US Métro en 2001, co obxectivo de profesionalizar ó equipo. Na tempada 2008/09 o Racing Metro 92 ascendeu ó Top 14, onde compite na actualidade. Na tempada 2010-2011 tamén compite na Heineken Cup, a máxima competición continental.
Ten a súa sede no departamento Altos do Sena (o departamento nº92 do norte da zona metropolitana de París) de aí o 92 no nome do club. O club xoga os seus partidos como local no Stade Olympique de Colombes, o mesmo no que se disputaron os Xogos Olímpicos de 1924.
.svg&lang=gl)
