Santo Isidro de Lamas do Biduedo é unha parroquia do concello lugués de Triacastela na comarca de Sarria. No ano 2007 tiña 102 habitantes (56 homes e 46 mulleres) distribuídos en 4 entidades de poboación, o que supón unha diminución de 15 habitantes en relación ao ano 2000.
O orónimo provén do latín lama, e indica un lugar con lama ou lodo.[2]
A igrexa parroquial está situada no núcleo de Lamas, nunha elevación do terreo. Foi construída en 1949, con estilo ecléctico de trazado neogótico e espadana clásica. Ten planta rectangular pechada cunha ábsida plana e cunha cuberta a dúas augas. O adro de acceso ten cuberta a catro augas. A fachada principal ten no lugar do rosetón un oco apuntado de iluminación. A espadana ten corpo central de dous ocos e medio punto con molduras e frontón triangular de remarte con pináculo e arco de medio punto. Na parte posterior sitúase a sancristía, máis baixa e reducida cá nave central.
No lugar do Biduedo hai unha capela adicada a San Pedro. Ten unha nave única duns 5 por 10 m, cun oco na fachada sur e cuberta a dúas augas con artesoado de madeira.
O Biduedo | A Lagúa | Lamas | Meizarán
A Balsa (San Breixo) | Cancelo (San Cristovo) | Lamas do Biduedo (Santo Isidro) | O Monte (Santa María) | Santalla de Alfoz (Santalla) | Toldaos (San Salvador) | Triacastela (Santiago) | Vilavella (Santa María)