Harry Potter e o misterio do príncipe (en inglés: Harry Potter and the Half-Blood Prince) é un filme de fantasía e drama[4] dirixido por David Yates e baseado na novela homónima escrita por J. K. Rowling. É o sexto filme da serie de filmes de Harry Potter. Foi escrito por Steve Kloves e producido por David Heyman e David Barron.[5] A historia céntrase no sexto ano de Harry Potter na Escola Hogwarts de Maxia e Feiticería, durante o que se obsesiona cun misterioso libro de texto, se namora e intenta conseguir un recordo que ten a clave para derrotar a Lord Voldemort. A película está protagonizada por Daniel Radcliffe como Harry Potter, con Rupert Grint e Emma Watson como os mellores amigos de Harry, Ron Weasley e Hermione Granger. O resto do elenco inclúe a Michael Gambon, Jim Broadbent, Alan Rickman, Tom Felton e Helena Bonham Carter.
O filme tivo a súa estrea no Reino Unido e os Estados Unidos o 15 de xullo de 2009. A recadación nas salas internacionais ascende a 933,9 millóns de dólares estadounidenses.[6] Recibiu unha candidatura aos Premios Oscar pola Oscar á mellor fotografía,[7] que finalmente gañou Avatar, e outra aos premios BAFTA aos mellores efectos especiais e ao mellor deseño de produción, ambos tamén gañados por Avatar.[8] O misterio do príncipe é un dos filmes da saga mellor valorados pola crítica.
Estreouse na TVG, en galego, o 25 de decembro do 2013.
Sinopse
No sexto ano de Harry en Hogwarts, Lord Voldemort e os Devoradores da Morte aumentan o terror que provocan na poboación máxica e muggle. Albus Dumbledore persuade un vello amigo Horace Slughorn para que regrese a Hogwarts como profesor; non obstante, Dumbledore ten unha razón importante para que Slughorn cubra a vacante. Durante unha clase de Apócemas, Harry toma posesión dun libro de texto pertencente ao "Príncipe Mestizo" e cheo de anotacións ás marxes. Entrementres, Dumbledore e Harry manteñen reunións secretas co obxectivo de descubrir como destruír a Voldemort definitivamente.
Elenco
- Daniel Radcliffe como Harry Potter, protagonista do filme.
- Rupert Grint como Ron Weasley, mellor amigo de Harry.
- Emma Watson como Hermione Granger, mellor amiga de Harry.
- Helena Bonham Carter como Bellatrix Lestrange, unha das Devoradoras da Morte máis leais a Lord Voldemort.
- Jim Broadbent como Horace Slughorn, o novo profesor de Apócemas de Hogwarts.
- Robbie Coltrane como Rubeus Hagrid, o gardabosques e profesor de Coidado de Criaturas Máxicas en Hogwarts.
- Warwick Davis como Filius Flitwick, o profesor de Esconxuros en Hogwarts e xefe da Casa Ravenclaw.
- Tom Felton como Draco Malfoy, inimigo de Harry e encargado de realizar unha misión secreta para Voldemort.
- Michael Gambon como Albus Dumbledore, o director de Hogwarts.
- Alan Rickman como Severus Snape, o antigo profesor de Apócemas e actual profesor de Defensa contra a Maxia Negra.
- Maggie Smith como Minerva McGonagall, a profesora de Transfiguración e membro da Orde do Fénix.
- Timothy Spall como Peter Pettigrew, o Devorador da Morte que traizoou os pais de Harry. Spall non ten liñas de texto durante o filme.
- David Thewlis como Remus Lupin, antigo profesor de Defensa contra a Maxia Negra e membro da Orde do Fénix.
- Julie Walters como Molly Weasley, a matriarca dos Weasley e figura maternal para Harry.
- Devon Murray como Seamus Finnigan, amigo de Harry.
- Matthew Lewis como Neville Longbottom, amigo de Harry.
Banda sonora
A banda sonora de Harry Potter e o misterio do príncipe lanzouse ao mercado o 14 de xullo de 2009. As pezas musicais foron compostas por Nicholas Hooper e dirixidas por Hooper e Alastair King. É a segunda banda sonora dun filme da saga Harry Potter feita por Hooper, que xa se encargara do filme anterior, Harry Potter e a Orde do Fénix. A banda sonora recibiu unha candidatura aos Premios Grammy na categoría de mellor álbum de banda sonora para unha película.
"Dumbledore's Farewell" emprégase de novo en Harry Potter e as reliquias da morte (2ª parte) durante as escena na que Harry ve os recordos de Snape no pensadoiro.
- Lista de pistas
- "Opening" - 2:53
- "In Noctem" - 2:00
- "The Story Begins" - 2:05
- "Ginny" - 1:30
- "Snape & the Unbreakable Vow" - 2:50
- "Wizard Wheezes" - 1:42
- "Dumbledore's Speech" - 1:31
- "Living Death" - 1:55
- "Into the Pensieve" - 1:45
- "The Book" - 1:44
- "Ron's Victory" - 1:44
- "Harry & Hermione" - 2:52
- "School!" - 1:05
- "Malfoy's Mission" - 2:53
- "The Slug Party" - 2:11
- "Into the Rushes" - 2:33
- "Farewell Aragog" - 2:08
- "Dumbledore's Foreboding" - 1:18
- "Of Love & War" - 1:17
- "When Ginny Kissed Harry" - 2:38
- "Slughorn's Confession" - 3:33
- "Journey to the Cave" - 3:08
- "The Drink of Despair" - 2:44
- "Inferi in the Firestorm" - 1:53
- "The Killing of Dumbledore" - 3:34
- "Dumbledore's Farewell" - 2:22
- "The Friends" - 2:00
- "The Weasley Stomp" - 2:51
Notas
Véxase tamén
Ligazóns externas
.svg){kind=small}
