Česká Filharmonie

O Rudolfinum, sala de concertos da Orquestra Filharmónica Checa.

A Česká Filharmonie (en galego Orquestra Filharmónica Checa) é a principal e máis célebre orquestra da República Checa. Foi elixida como unha das mellores dez orquestras europeas nunha votación da revista francesa Le Monde de la Musique.^[1] A súa sede está no Rudolfinum de Praga.

Historia

Os precedentes da orquestra hainos que buscar no século XIX, cando a orquestra da Ópera Nacional de Praga comezou a organizar concertos sinfónicos. O primeiro concerto da orquestra co seu actual nome tivo lugar o 4 de xaneiro de 1894, cando ofreceron obras de Antonín Dvořák dirixidas polo propio compositor. A partir de 1901 a Orquestra Filharmónica será totalmente independente da orquestra da ópera.

En 1908, Gustav Mahler dirixiu coa orquestra a estrea mundial da súa Sinfonía n.º 7.

Foi co director Václav Talich cando a orquestra acadou recoñecemento internacional pola súa calidade, que se mantivo con batutas posteriores tan prestixiosas como as de Václav Neumann, Karel Ančerl ou Rafael Kubelík. Á parte dos seus directores titulares, tamén ten sido dirixida por importantes directores convidados, entre os que hai que salientar ao gran especialista en música checa Sir Charles Mackerras.

Gravacións discográficas

En 1929 a Orquestra Filharmónica Checa realizou a súa primeira gravación. Foi coa gravación do ciclo de poemas sinfónicos Má vlast de Smetana. O director foi o titular da orquestra naquel momento, Václav Talich.

Directores titulares

• Eliahu Inbal (2009 - )
• Zdeněk Mácal (2003–2007)^[2]
• Vladimir Ashkenazy (1996–2003)
• Gerd Albrecht (1993–1996)
• Jiří Bělohlávek (1990–1992)
• Václav Neumann (1968–1989)
• Karel Ančerl (1950–1968)
• Rafael Kubelík (1942–1948)
• Václav Talich (1933–1941)
• Václav Talich (1919–1931)
• Vilém Zemánek (1903–1918)
• Ludvík Čelanský (1901–1903)

Notas

1. "The Top Ten European Orchestras, According to Ten European Media Outlets". Arquivado dende o orixinal o 09 de xullo de 2016. Consultado o 05 de decembro de 2011. 
2. "Angry Over Bad Review, Conductor Zdenek Mácal Abruptly Quits Czech Philharmonic". Arquivado dende o orixinal o 26 de maio de 2011. Consultado o 05 de decembro de 2011. 

Véxase tamén

Ligazóns externas

• Sitio web oficial da Česká Filharmonie
• Arquivo František Sláma Arquivado 24 de setembro de 2015 en Wayback Machine.