De Boskplaat is in natoergebiet oan de eastside fan it waadeilânSkylge fan sa'n 10 by 5 kilometer. It is yn behear by Steatsboskbehear.
Bisten
Untelbere fûgelsoarten briede op de Boskplaat, dy't yn it briedseizoen dêrom ek foar in part net tagonklik is. Wichtige briedlokaasjes fan Sulvermiuw, Lytse Sjouwerman en Leppelbek binne sluten foar publyk fan 15 maart oant 15 augustus. Wol kin it sânpaad lâns de dunerige it hiele jier troch brûkt wurde. Op fochtige klaaiïge grûn tusken de sâltfegetaasje op it skoar lâns de waadkant fan de Boskplaat, mar benammen op de ouwerwâlen fan de slinken dy't it skoar trochsnije, libbet it Mûze-earke. Dat is in longslak dy't op it lân libbet, mar seewetter foar de fuortplanting nedich hat. Oan de Noardseekant fan de Boskplaat spiele neist de skulpen út de tsjintwurdige seefauna ek in soad fossile skulpen oan dy't ôfkomstich binne út it Eemiën, de waarme perioade foar de lêste iistiid.
Plaat
Sa't de namme al fermoeden docht wie it gebiet yn eardere tiden in losse sânplaat eastlik fan Skylge. De slinke tusken de twa, it Koggedjip, is lykwols tichtslibbe. Tusken 1931 en 1937 is it gebiet mei Skylge ferbûn troch de oanlis fan in stodyk mei in lingte fan hast 9 kilometer, dy't de namme Derk Hoekstra Stodyk krigen hat. Yn it earstoan wie it de bedoeling mei de oanlis fan dy stodyk in oanset te jaan ta it skeppen fan kultuerlân. Uteinlik is it gebiet útgroeid ta ien fan de meast weardefolle natoergebieten fan Nederlân. Yn 1970 krige it gebiet de status fan Europeesk Natoerreservaat. De Boskplaat is sûnt 1910 eigendom fan Steatsboskbehear.
Misbegryp
In algemien misbegryp oer de Boskplaat is dat it gebiet eartiids beboske west hawwe soe. It tsjinoerstelde is wier. 'Bosk' betsjut yn de âlde beneaming gewoan 'ferheging yn it lânskip of 'dún'.
Planten
It westlike part fan it natoerreservaat heart net by de oarspronklike sânplaat, mar is in part fan it âlde dúngebiet fan Skylge. Dêr lizze inkele hege dunen, wêrûnder it ferneamde aktyf stowende Parapludún. Yn dit dúngebiet is spontaan in grut bjirkebosk ûntstien, dat de namme Bjirkefallei hat. Troch in dúnbrân yn 2004 is fan dit bosk lykwols 65 hektare ferlern gien. Bysûndere plantesoarten yn dit part fan de Boskplaat binne Miggekrûd, Glop, Bearedrúf, Toffels-en-skuon, Skylger Sigge, Heiderinkelbel en Duvelsklau. Ek komme hjir inkele falleien foar mei fegetaasjes fan Leppeltsjeheide, dy't ek wol Cranberry neamd wurdt.
Benoarden de stodyk is nei 1970 op it Noardsee-strân in nije dunerige ûntstien, wêrtroch in part fan de strânflakte ôfsnien is dat sûnt begroeid rekke is. Dat stik hjit fan Cupido's Polder. Hjir is ien fan de grutste groeiplakken fan Lytse Skieppetonge yn Nederlân.
Boarnen, noaten en referinsjes
Boarnen, noaten en/as referinsjes:
Visser G., 1994. De Bosplaat, Terschellingers scheppen een Europees natuurreservaat. Van Gorcum, Assen.
Westhoff, V., 1947. The vegetation of dunes and salt-marshes on de the Dutch islands of Terschelling, Vlieland and Texel. Diss. R.U. Utrecht
.jpg)
