Janed Bro-Saoz, priñsez Kembre

• Ur pennad Janed Bro-Saoz zo ivez.

Janed Bro-Saoz, priñsez Kembre

den

Reizh pe jener	plac'h
Anv e yezh-vamm an den	Joan of Wales
Anv-bihan	Joan
Titl noblañs	priñsez
Deiziad ganedigezh	1191
Lec'h ganedigezh	Frañs
Deiziad ar marv	2 C'hwe 1237
Lec'h ar marv	Kembre
Lec'h douaridigezh	Llanfaes Friary
Tad	Yann Iañ
Mamm	Clementia
Pried	Llywelyn ab Iorwerth
Bugel	Dafydd ap Llywelyn, Elen ferch Llywelyn, Angharad ferch Llywelyn, Gwladus Ddu
Familh	Tiegezh Plantagenet
Micher	brientin
Karg	princess consort
Statud sokial	royalty

Arched-maen Janed

Arched-maen Janed, en iliz Biwmaris, en Enez Mon.

Janed Bro-Saoz, pe Siwan e kembraeg (war-dro 1195 - 2 a viz C'hwevrer 1237), a oa merc'h bastard d'ar roue saoz Yann Dizouar. Dimeziñ a eure da Llywelyn Fawr, Priñs Kembre e 1205, ha mamm da Dafydd ap Llywelyn a renas war-lerc'h e dad. Brudet eo hec'h anv abalamour d'he c'harantez ouzh ur baron norman Gwilym Brewys. Pouez bras he doe koulskoude ha levezon e kuzul ar priñs.

Istor

Clementia Pinel e oa anv he mamm, ur plac'h eus lez ar roue. N'ouzer netra diwar he fenn .^[1]. N'eus nemet ur meneg eus anv mamm Janed, da vare marv ar briñsez, e Kronikl Tewkesbury ma vez graet anezhi "reginæ Clemenciæ" ('Rouanez Clementia').^[1] Hanter-c'hoar eta e oa Janed d'ar roue saoz Herri III ha da Janed Bro-Saoz, rouanez Bro-Skos (1210-1238). Marteze e oa ganet a-raok da Yann dimeziñ d'e wreg kentañ e 1189, met n'haller ket bout sur abalamour d'an diouer a destenioù. Eus he bugaleaj n'ouzer tost netra. E Bro-C'hall e tremenas Siwan he bugaleaj, war a greder; en 1203 pe 1204 e voe kaset ac'haleno gant Yann da Vro-Saoz, dre Normandi, evit he dimeziñ .

Kembre

Dimeziñ a eure da Llywelyn Fawr, roue Gwynedd, e 1205. Marteze ne oa ket 15 vloaz, un dra voutin en amzerioù-se. Un eured politikel e oa evel-just, da siellañ an emglev etre Llywelyn hag ar roue Yann e 1204. Galleg Nomandi a gomze Siwan, dre ma oa bet maget eno, ha honnezh eo a yezh al lezioù gall ha saoz. Moarvat ne ouie ket nemeur a saozneg, met kembraeg a zeskas goude dont da chom da rouantelezh Gwynedd.

Karantez

Garth Celyn, Aber; marteze eo eno e voe bac'het gant he gwaz.

Karantez a vagas ouzh Caf Gwilym Brewys (William de Braose), aotrou Normaned Rouantelezh Brycheiniog, e 1230. Kavet e voe Janed ha William en he c'hambr gant Llewelyn. Krouget e voe ar baron norman, ha bac'het priñsez Kembre gant Llywelyn ur pennad berr, rak pardoniñ a reas dezhi.
Hervez mojenn ar c'hornad eo dirak Garth Celyn, lez ar priñs, e voe savet ar groug e Abergwyngregin, met hervez ur vojenn all eo e Crogen, e-kichen Y Bala.

He marv

Bez Siwan en iliz Biwmaris.

.

Mervel a reas Janed e miz Meurzh 1236 ha beziet e voe e parrez Llanfaes e-kichen Biwmaris en Enez Mon. Hiziv emañ he bez-maen gant he delwenn warni en Iliz Biwmaris.

He bugale

Pevar pe pemp bugel he doe:

• Dafydd ap Llywelyn (war-dro 1215-1246), a voe Priñs Gwynedd e-pad 6 vloaz, hag a zimezas da Isabella de Braose
• Margaret, a zimezas da John de Braose, ma-bihan Gwilym Brewys
• Elen ferch Llywelyn (1207-1253) a zimezas da John le Scot, kont Chester, ha da Robert de Quincy
• Gwladus Ddu († 1251). N'eur ket peursur e oa Janed a oa mamm Gwladus, met merc'h da Llywelyn e oa. Div wech e timezas Gwladus: da Reginald de Briouze da gentañ, da Ralph de Mortimer († 1246) da c'houde.
• Susanna a voe kaset da ouestl da Vro-Saoz en 1228, met marteze n'eo ket Janed e oa he mamm.

Bugale all en doa Llywelyn Fawr. Krediñ a reer eo Tangwystl Goch an hini a oa mamm da Gruffudd ap Llywelyn Fawr, breur henañ Dafydd, ha se zo kaoz ne voe ket ar bastard a renas.

Lennegezh

• Siwan, pezh-c'hoari gant Saunders Lewis.

Notennoù

1. Charles Cawley: Medieval Lands, Wales