Moskau (russ.Москва́, Moskwa) is de Hauptstod vo Russland und mit rund 11,5 Müllionen Einwohnan (2010)[1] in da Stod und 14,6 Millionen (2007)[2] in da Agglomeration de greßte Stod und Agglomeration vo Eiropa. Moskau is a da - mit Obstaund - wichtigste Vakeasknotn und de greßte Industriestod vo Russland.
Seitn 16. Joahundat wiad Moskau aa ois Drittes Rom bezeichnet. Da Kreml und da Rode Plotz im Zentrum vo Moskau stengan seit 1990 auf da UNESCO-Listn vom Wödkuituaeabe.
Geografie
Log
Moskau liegt im eiropäischn Teu vo Russland. De duachschnittliche Hächn betrogt 156 Meta üban Meerespiegl. De Stod liegt im Hüglland zwischn Oka und Wolga aun den Ufan vo da Moskwa, aan Nemfluss vo da Oka, de wos söwa in de Wolga mündd.
De Moskwa duachqueat des Stodgebiet in Mäandan vo Noadwest noch Südost auf aana Länge vo rund 80 Kilometan. Innahoib vo Moskau betrogt de Braadn vom Fluss 120 bis 200 Meta. Rund 120 klaane Flüsse stremen auf Moskau zua. Bis auf 14 san olle in untairdische Roasysteme valegt. Da 128 Kilometa launge Moskau-Wolga-Kaneu (1937 featiggstöd) soagt fia a schiffboare Vabindung zum Iwankowoer Stausee und zua Wolga.
Moskau spüd de Schlisslroin fia de Wiatschoft vo Russland. Da Anteu vo da Stod am Bruttoinlandsprodukt (BIP) vom Land liebt bei 20 Prozent, am gsamten Anzlhandel vo Russland bei rund 30 Prozent.[3]
Rund a Viatl vo da Industrieproduktion vo Moskau entfoin aufn Maschinenbau. Weitare Industriezweige san des Hittnwesen, de Leicht-, Kroftfoazeig-, Baustoff-, Chemie- und de petrochemische Industrie. De Stod is a des Zentrum vom Militär-Industrie-Komplex in Russland.
Vo Aunfaung aun is Moskau mitn Schicksoi vom russischn Voik untrennboa vabundn. Es is kaa Zuafoi, dass Auslända friaha oft stott Russland „Moskowia“ gsogt hom und zu de Russn „Moskowiter“.
A Legendn eazöht, dass da Fiast Juri Dolgoruki (1090–1157) a hözane Stod baun hod lossn und, dass de Stod nochm Fluss gnennt woan is, aun dems liegt. De easchte schriftliche Eawähnung vo Moskau staumt ausn Joa 1147, des wos heit ois Grindunsjoa vo Moskau güt. Owa scho laung vuahea hods in da Gegend Besiedlungen gem, de ötastn davo vua rund 5.000 Joa.
