Les islles Pingüín (inglés: Penguin Islands) son un grupu d'islles y roques asitiaes a lo llargo de 355 km de la mariña de Namibia, que formalmente tán arrexuntaes como islles fuera de costa. La islla de mayor extensión ye la islla Posesión, con 0,90 km² de superficie. Islla Hollams birds ye la más septentrional y, a una distancia de 10,3 km, ye la más alloñada de la mariña. Toles islles xuntes tienen 2,35 km² de superficie.
Riques en guanu y estratéxicamente allugaes, ente 1861 y 1867 les islles fueron amestaes por Gran Bretaña, y formalmente so la Colonia del Cabu en 1873. El tracamundiu sobro la llegalidá de la tresferencia fixo necesariu que la colonia reafitara l'anexón en 1874. Esti estatus foi reconocíu por Alemaña en 1886. Poro, anque tán cerca y a lo llargo de la parte continental de l'actual Namibia nun fueron parte del África del Sudoeste Alemana.[1][2]
En 1990, África del Suroeste llogró la independencia como Namibia. Sicasí, les islles permanecieron so la soberanía de Sudáfrica. Finalmente, dempués de nueves negociaciones, a la medianueche del 28 de febreru de 1994 la soberanía sobro les islles, según la badea de Walvis, fueron tresferíos formalmente a Namibia.[3]