La sierra de l'Algarbe ye un releu de los Monts Universals con dirección N-S adintro de la Serranía d'Albarracín y de la branca castellana de lo Sistema Iberico.
Se situa a l'ueste de las muelas de Val de Cuenca y Saldón y a lo norueste de la sierra de Chabalón.
Toponimia
L'oronimo sierra de L'Algarbe u sierra d'El Galbe se relaciona con l'antiga heredat u masada medieval dita Algarbe u L'Algarbe, una de las pocas con nombre arabe de la redolada[1]. Esta heredat ha dau nombre a lo barranco de L'Algarbe y a una partida de lo nord-este de lo termin municipal de Terrient a on que se troba lo casal despoblau de Molinos d'Algarbe.
Orografía
La principal altaria ye l'alto de l'Algarbe con 1.583 m y a bel 1 km a lo norte de Terrient. Un atra altaria important ye l'alto de Sant Quílez.
Hidrografía
La versant ueste de la sierra de l'Algarbe desaugua enta lo barranco de l'Algarbe (tributario de lo río de la Fuent d'el Berro), la versant ente lo fa en barrancos que complegan en lo barranco de Mierla (tributario de lo río Guadalaviar).
Superficie por municipios
La superficie de la sierra de l'Algarbe ye en lo termin municipal de Terrient.
Cheolochía
Los materials cheolochicos representaus en la sierra de l'Algarbe son d'edat churasica y cretacia en contacto mecanico por meyo de fallas[2].
Los materials churasicos son los Sallagons de Sot de Chera (Oxfordián), y las Calsineras con oncolitos de Figueruelas (Kimmeridgián), que resaltan topograficament en forma de muela[2].
Los materials cretacios[2] son las Calsineras dolomiticas de Nuévalos (Cenomanián), las Calsineras nodulosas de Monterd (Turonián), y las Calsineras bioclasticas de Charaba (Turonián). Estas zagueras son muito masivas y que dan un resalte caracteristico en terreno[3].
Referencias
Bibliografía
