Un hespital[1][2] u clinica[1] ye un edificio destinato a tener cura d'as patolochías u malautías y d'os traumatismos masiau complexos ta poder estar tractatos en o domicilio, en un centro de salut, u en o estudiet d'un medico. A os grans hespitals tamién se les diz centro hespitalario de referencia.
En la mayoría d'os países desenvolicatos, respective a o domicilio y o estudiet d'o medico, o centro hespitalario presenta l'avantalla de tener:
una hichiene guaranciata por un personal de limpia.
una vichilancia de 24 horas sobre 24 y de 7 dies sobre 7 por personal medico y paramedico.
as competencias (medicos especialistas) y o material ta efectuar os examens y as curas, y as salas d'operacions.
Bel hespital tien un servicio d'urchencias, y mesmo tamién un servicio móbil d'urchencia y de reanimación.
Historia
A parola hespital viene d'o latínhospes, "huespede" u "vesita", pero tamién "ahuespador". De hospes se derivó hospitalia, "casa ta vesitas foranas". Alavez a parola feba referencia a mesons u cubillars a on que un guarda hespitalero ufriba refuchio a viachers y pelegrins, por ixo a sobén se trobaban en puestos de paso y camins. D'a epoca medieval podemos trobar eixemplos d'hespitals en Aragón en puertos pirenencos con un gran paso de pelegrins como o Hespital de Benás u o Hespital de Santa Cristina de Somport.
Dimpués hospitalia se transformó en hespital ta designar o puesto d'auxilio a os viellos y malautos, con o significato que hue se fa servir.
