Roteflue liggt im obere Ergolztal ganz im Oschte vom Kanton uff 471 m.ü.M. Es isch dr erscht eigentligi Ort im Ergolztal sälber. Zwar liige au d Nochbergmeinde Ammel und Oltige a dr Ergolz, doch hett sich d Ergolz z'Oltige no nid es Tal grabe und Ammel liggt uff enere Terrasse näbem eigentlige Tal. Witeri Nochbergmeinde sin Wäislinge, Ormalinge, Hemmike und die aargauischeWägestette und Wittnau.
Wappe
S Wappe vo 1946 zeigt uff goldigem Grund e griene Dreibärg mit enere rote Flueh, wo vo zwei griene Tanne flankiert isch. Si wiise druff hy, dass 56% vom Gmeinibann uss Wald bestöön. D Farbe stamme vo dr ehemoolige Vogtei Farnsburg.
Gschicht
Roteflue isch dr Räscht vomene ehemoolige Konglomerat vo vier bis siibe friehmittelalterlige Wiiler: Loglingen, Hendschikon, Söllickken, Werlickhen, Hohlwingen, Gastwingen und Werdlingen. Währenddäm die meischte vo de alte Willer verödet sin, hett sich Loglingen zem hyttige Roteflue entwicklet. Dr Ort isch 1196 als Rotenfluo s'erschti Moll erwähnt worde. Näb Loglingen alias Roteflue, au Oberroteflue gnennt, hett bis ins Spotmittelalter no Hendschikon als Niiderroteflue witerexischtiert. Vo de frienere Wiiler isch hytte nyt me z'gseh oder hegschtens no Einzelgheeft. D Bsitzesverhältnis sin je noch Wiiler unterschiidlig gsi und hän hyffiger gwäggslet. Im 15. Joorhundert hett e Familie Münch vo Münchestai beidi no exischtierendi Dorfteil kauft. 1545 hän sie alli Rächt dr Stadt Basel abträtte.
Sport
Rotheflueh verfyegt über verschiedeni Sportklubs. Zum eine de Schützeverein Rotheflueh, dr TV Rotheflueh und d'IHC Red Rocks Rothenfluh.
Die ersti Mannschaft vom IHC RR Rotheflueh hets momentan bis in d'NLB gschafft.
Sehenswürdigkeite
Pfarrchile St. Stephan mit eme typische Käsbisseturm. Dr hyttig Bau stammt vo 1856, dr Chileturm scho vo 1613
Pfarrhuus. 1534 ischs Pfarrhuus völlig abbrennt. Dr Neubau im gotische Stil isch woorschiins zem Teil mit Stei vo dr im gliiche Joor abgrissene St. Georgs-Chile erstellt worde.
Spiicherhuus uss em 17. Joorhundert
Gränzstei mit em Wappe vom Bischtum Basel und de Habsburger. Dä Stei erinneret a d Gränze zwischem Sisgau und em Frickgau, wo durch Roteflue dure gange isch.
