De Brenno hät mereri Quällflüss im Gränzgebiet vom Tessin zum Bündnerland. Aine isch de Brenno della Greina, wo westlich vom Greinapass entspringt und dänn Bäch, wo vom Piz Medel obe abe chömed ufninnt. Er dorflüsst zerscht s Val Camadra, ninnt dänn bi Campo de Abfluss vom Stausee Lago di Luzzone uf und chunnt z Olivone mit em Brenno del Lucomagno zäme, wo vom Lukmanierpass abe flüsst. Döt obe gits bi de Alpe Pertusio uf 1'828 m ü. M. es grosses Loch im Felse, wo rächt vill Wasser use sprudlet und da haisst uf de Schwizer Landcharte Sorgente del Brenno, wa sövil wie Quäll vom Brenno bedüted.
De Brenno dorflüsst ab Olivone s Bleniotal vo Norde noch Süde und mündet bi Biasca in Tessin. Im Underlauf, zwüsche Malvaglia und Biasca, gits en Chegel vom en ehmolige Bärgsturz, em Buzza di Biasca.
