Dr Achilles Hueber isch am 9. Februar 1776 z Sissach as Soon vom Pfarrer Johann Jakob Hueber uf d Wält choo. Es cha si, ass er si erste Underricht bim Johann Ulrich Büchel z Baasel überchoo het. Denn het er e vierjöörigi Leer zum Stäimetz bim Wärkmäister Niklaus Sprüngli z Bärn gmacht. In de Joor 1798 bis 1802 het er für verschidnigi Archidekte z Züüri, Stroossburg und Karlsrue gschafft. Z Karlsrue isch er e Schüeler vom Friedrich Weinbrenner gsi, won e groosse Iifluss uf en ghaa het.
Denn het dr Hueber en äignigs Baugschäft z Baasel ghaa und isch 1803 Mitgliid vo dr Zumft zu Spinnwätter worde. Hüte schribt men em nume no drei Baute zue. Mä het von em au e baar Archidektuurzäichnige und en Entwurf für e Theater uf em Petersblatz z Baasel us em Joor 1813.
1804 het dr Achilles Hueber d Susanna Catharina Beck ghürootet. Er isch am 7. Juli 1860 im Alter vo vierenachzig z Baasel gstorbe.
