Monaco (Monegaskisch: Principatu de Munegu; Frans: Principauté de Monaco) is e klêene stoat in Zuud-Europa. D'r weunn mêer of 30.000 menschn en met een ippervlakte van 2,02 km² is 't doamee de dichtst bevolkte onafhanklyke stoat ter weireld. Den hoofdstad en grotste stad is Monaco-Ville of Monaco-Stad. D'officiële toale is Frans, moa der wordt ôok Italioans, Iengels en 't lokoal Monegaskisch (dat ofstamt van 't Genuees dialect) gesprookn. Alhoewel da Monaco an de landkant hêlegans begrensd wordt deur d' Europeesche Unie, is 't land der gin lid van.
Geschiedenisse
De noame Monaco stamt of van 't Grieks Monoikos, van μόνοικος "ienkel huus", van μόνος "allêne, ienkel" + οίκος "huus". In de 6e êeuwe v.Chr. èn Phocaeërs der e kolonie gesticht, die deur Liguriërs bevolkt wierd.
Monaco van nu begost lyk e kolonie van Genua in 1228. Up 8 januoari 1297 grypt de Grimaldi-familie vo den êeste kêe de macht in Monaco.[1] François Grimaldi veroverde, verklid lyk e franciscoansche monnik (toevallig monaco in 't Italioans) 't fort, die de beroemde Rotse van Monaco beschermde in 1297. Sedertdien is de familie Grimaldi deur erfipvolgienge olsan an 't bewiend gewist.
Geografie
Monaco ligt in 't zuudn van Vrankryk an de Middellandsche Zêe, 18 kilometer ten ôostn van Nice en vlak by d' Italioansche grenze. An de landkant is 't hêlegans ingeslootn deur 't Frans departementAlpes-Maritimes. Monaco bestoat uut e smalle stroke land langst de kust an de voet van d' heuvels die 't begun vormn van d' Alpn.
In 2008 bezocht Z.D.H. Prins Albert II Ostende in 't koader va 't 50-joarig bestoan van de steednband.[2]
Bekende Monegaskn
Prins Albert van Monaco
Prinsesse Caroline van Monaco
Prinsesse Stephanie van Monaco
Olivier Beretta, Formule 1-coureur
Louis Chiron, autocoureur
Manuel Vallaurio, foetbollist
Trivia
De Grand Prix Formule 1 van Monaco is êen van de bekendste koersn uut d' autosport, en buutn de nachtkoers in Singapore d' ênigste Formule 1-wedstryd die hêlegans up e stroatcircuit gereedn wordt. De Grand Prix goat ieder joar deure in de moand meie.