Uz' Ladog (ven.: Но́вая Ла́дога, suom.: Uusi-Laatokka) om Venäman lidn da lidnankund Leningradan agjan keskuzpalas. Se om Volhovan rajonan kaikiš penemb lidn.
Istorii
Petr I pani eländpunktan alust vl 1704 lidnan statusanke kuti verf' sauvomha laivoid. Edel sidä Nikolo-Medvedskii (Nikol'sko-Medvedovskii)-jumalankodin aluz oli pandud 14.−15. voz'sadoil nügüdläižen lidnan territorijas. Jumalankodi oli tühjitadud Uden Ladogan alusenpanendan ühtes.
Uden Ladogan ižandusen päsarakod oma sömtegimišt, kalanpüdand da turizm, mugažo laivansauvomižtegim oli (sirdi Piterihe), verf'[1] radab, kondensatorantegim[2] da nahkgalanterejan fabrik[3] (matkliphad) oma saudud lidnas.
Geografijan andmused
Lidn sijadase rajonan pohjoižes, Olhav-jogensun hural randal läz Ladoganjärved, 15 m ü.m.t. keskmäižel korktusel.
Matkad Piterihesai om 130 kilometrad päivlaskmha, Volhov-rajonkeskushesai — 24 km suvhe.
Tobmuz
Uz' Ladog jagase nelläks lidnanlaptaks. Kaik nell' pen't küläd mülüdas lidnankundha Uden Ladogan ližaks: Dubno (11 rist. vl 2017), Kivgod (Кивгода, üks' eläi), Ligovo (4 rist.), Sumskoje (6 rist.). Lidnankundan pind — 143,5 km².
Lidnankundan tobmuden pämez' om sen Deputatoiden nevondkundan ezimez'. Edeline ezimez' om Väčeslav Senčukov (reduku 2019 — kül'mku 2020). Administracijan pämez' om Igor' Cigankov vn 2019 kül'mkuspäi. Edeline Administracijan pämez' om Ol'ga Baranova, radoi vn 2019 sügüz'kuhusai.
Eläjad
Vn 2010 Venäman rahvahanlugemižen mödhe lidnan eläjiden lugu oli 8 838 ristitud, lidnankundan — 8 915 ristitud. Kaik 8 413 ristitud elihe lidnas vl 2017. Kaikiš suremb lidnan kaikenaigaine ristitišt oli 11 310 eläjad vl 1989.
Ortodoksižen hristanuskondan seičeme pühäpertid[4] oma kaičenus i saudud lidnas: Pühän Jumalanmaman Sündundan päjumalanpert' (om ližasaudud vll 1876−1877), ph. Mikulai-čudonsädajan päjumalanpert' (alusenpanend 1450−1500, ei ole väges), viž jumalanpertid. Niiden ližaks kaks' časounäd oma kadonuded.
Lapsiden opendusen aluzkundad oma kaks' päivkodid, keskškol, čomamahtoiden škol, lapsiden sädamižen pert', lapsiden da norišton turizman i purehsportan keskuz. Professionaližen opendusen aluzkundad ratas lähembaižiš lidnoiš.
Transport
Kaks' federališt avtoted ühtenzoittas lidnas: «Kola» (P21, E105) i «Uz' Ladog — Vologd» (A114).
Lähembaine raudtestancii om Volhovstroi I, sijadase 24 km suvhe.
Galerei
-
Lidnan administracijan pert' (2020)
-
Ph. Jumalanmaman Sündundan päjumalanpert', vn 2016 nägu (ende Ioann Jumalantedomehen)
-
Uden Ladogan laivansauvomižtegim vl 2012
-
Čomamahtoiden škol (2020)
-
Torguindrived (Adivpert'tanaz) vl 2018
Homaičendad
- ↑ Ladogan verfin sait (ladverf.ru). (ven.)
- ↑ Uden Ladogan kondensatorantegimen edheotandan sait (amficond.ru). (ven.)
- ↑ Uden Ladogan nahkgalanterejan fabrikan sait (kgfnola.instella.ru). (ven.)
- ↑ Uden Ladogan pühäpertid sobory.ru-saital. (ven.)
Irdkosketused
