El teritorio de ła provincia el xe el Połéxine d'inqûo[2] o el ghe se cata tuto rento[3].
El ga n'àrea de 1 789 km² e a ghe stà 244 625 àneme ('nte el 2005).
El xe un guałivo alto tra i -2 e i 15 m s.l.m..
El confin setentrional el va seconda del Àdeze a partir de Badìa Połézine fin inte el mar, fora che el teritorio de Cavàrsere che el xe inte ła provincia de Venesia.
El confin meridional el va seconda del Po a partir de Mełara fin inte el mar. Inte ła provincia se cata tuto el delta del Po, e el confin el va seconda del Po di Goro.
Ła tera ła se ga fata da poco, tirà su da łe fiumane del Àdeze e del Po, che i ne ga dà un percorso fiso e dei àrxeni soło che in sti ùltimi tenpi.
Cusì ła tera ła se sbasa par subsidentia parché ła se ga sugà co łe bonìfiche e deso ła xe drìo conpatarse; se ga xontà anca l'omo, che el ga tirà su l'aqua e el metano da sototera[4].
N'altro fiume el traversa ła provincia: el xe el Canal Bianco; pì ghe xe anca asè scołi de bonìfica parché el Po e el Àdexe i xe el primo e el terzo dei fiumi itałiani par portar aqua, e donca ghe xe asè aqua da tirar vìa.
I scołi pì asè inportanti i xe el Collettore Padano, el Ceresoło e el Valdentro.
Ghe xe anca dei altri canałi che i xe stà inportanti par ła storia: i xe l'Adexeto, che el xera un vecio córso del Àdexe; el Poaso, che el xera un vecio córso del Po; ła fosa Polxeła, che el xera un vecio canal che se podéa navigar dal Canal Bianco inte el Po.
El clima el xe semicontinental e asè mojo; ghe xe sòfego d'istà e ghe xe nebia d'inverno.
Ła piova ła vien xó normal, specie de primavera e d'autuno[4].
Demografia
Anca ai dì d'anqûo ghe xe xente che i emigra da ła provincia de Rovigo; i xe soratuto i xóveni che i va a laorar inte łe sità pì sviłupàe del Vèneto o de l'Itałia, e par questo che inte ła provincia ghe xe senpre pì asè veci.
Ghe xe anca qûei che i migra da łe canpagne ma che i resta inte ła provincia e i va inte i sentri pì svilupài[4].
Comuni
Ghe xe 50 comuni inte ła provincia de Rovigo; i pì asè grandi i xe:
