روس کے سکھوئے طیارے کو ترک فضائیہ نے 24 نومبر 2015ء کو ترک- شام سرحد کے قریب مار گرایا۔ ترکی کے مطابق روس کو کئی مرتبہ متنبہ کیا گیا تھا پر بار بار فضائی حدود کی خلاف ورزی کی بنا پر روسی طیارے کو گرایا گیا۔ نیٹو کے متعین کردہ جنگی قوانین کے مطابق فضائی حدود کی خلاف ورزی کرنے والے کسی بھی طیارے کو پہلے تین مرتبہ خبردار کیا جاتا ہے، تین مرتبہ خبردار کرنے کے باوجود اگر خلاف ورزی کرنے والا طیارہ اپنا راستہ نہیں بدلتا تو پھر اس کے خلاف کارروائی کی جا سکتی ہے۔
ترکی کے مطابق ترکی نے روس کو دس مرتبہ متنبہ کیا تھا، روسی طیارہ 2 کلومیٹر فضائی حدود سے تجاوز کر چکا تھا، ایک جنگی طیارہ یہ فاصلہ تقریباََ 17 سیکنڈز میں طے کرتا ہے۔[1][2] دوسری طرف روس نے تردید کرتے ہوئے کہا ہے کہ روسی طیارے شامی فضائی حدود سے کبھی باہر نہیں گئے اور اس طیارے کو شامی حدود میں ہی مار گرایا گیا تھا۔[3]