Rotterdam es la segonda vila dels Païses Basses après la capitala nacionala Amsterdam. Se situa dins la província d'Olanda Meridionala, dins lo deltà de Ren-Mòsa, en riba de la Mar del Nòrd. Sa populacion èra estimada a 664 311 abitants, en 2023. Sa superfícia totala es 319 km².
Còr industrial del país, son pòrt èra lo onzen mondial en 2022 e lo primièr europèu, sas infrastructuras portuàrias s'estendon sus prèp de 42 quilomètres. La capacitat e la modernitat d'aquestas li garantisson un quasi-monopòl sus las arribadas d'idrocarburs, en essent lo sol pòrt europèu, amb Le Havre, capable d'aculhir de supertankers transportant fins a 400 000 tonas de petròli. Lo pòrt es tanben un pòl important per las matèrias primièras e los conteneires.
Cultura
Lo musèu Boymans Van Beuningen (en neerlandés, Museum Boijmans Van Beuningen) es lo principal musèu d'art de Rotterdam. Lo sieu fons compren dempuèi l'art europèu medieval fins a l'art modèrne.
Lo musèu Boymans recebèt un legat de l'industrial e colleccionaire olandés Daniel George Van Beuningen (1877-1955), e venguèt lo Musèu Boymans Van Beuningen.
