La dinastia egipciana zèro qu'ei la dinastia on e son amassats los reis de Hauta Egipte de la fin deu periòde predinastic (abans la purmèra dinastia). Las tres principaus vilas de la region qu'èran Tinis, Nobt (tanben coneguda com Nagada, sit de longa ocupacion preïstorica) e Nekhen (Ἱεράκων πόλις en grèc, transliterat Iereconpolis). Tinis que dà justament lo son nom au periòde tinita (lo de las duas purmèras dinastias).
Ad aquesta epòca Hauta e Baisha Egipte b'èran pas eqüèra unificadas e la ciutat principau d'aqueths reis sudistas de la dinastia 0 que sembla fin finau d'estar estada Nekhen.
Qu'avem pauc de documents suber aquesta dinastia, e quan n'avem, que son presentacions graficas d'òmis e de hèitas o protoieroglifs mei que mei figuratius (aquò que vòu díser qu'un signe qu'ei aquiu entà simbolizar ua idèa o un nom, e, dilhèu, lo son associat ad aquesta idea). Dens aquesta dinastia òm hica per exemple lo rei Òrus Escorpion.
La dinastia 0 (e lo periòde predinastic dab era) que s'acaba dab l'unificacion d'Egipte (tant vau díser la conquesta de la Baisha Egipte per la Hauta Egipte) peu rei semilegendari Narmer.
Sobeirans amassats dens la dinastia 0
