Bèlagarda (Bellegarde en francés) es una comuna lengadociana situada dins lo departament de Gard e la region d'Occitània, ancianament de Lengadòc-Rosselhon.
Bèlagarda es atestat Bella Garda en 1208, mas tanben un vintenat d'annadas après dins la Canson de la Crosada, tot dreit a Belagarda. Garda ven dau germanic *wardon, « gardar », wart, « garda », puèi « torre de gaita », puèi « fortalesa » en general; bèla es simplament un adjectiu valorizant. Los noms dau tipe Bèlagarda son doncas associats a de fortalesas, de torres de gaita; son presents en Occitània e en Arpitània e gaireben absents en França pròpiament dita. La sola comuna d'aqueu nom i es Bellegarde, dins lo Loiret [1],[2],[3] e lo nom es un transferiment d'un nom occitan francizat : lo vilatge se disiá Choisy-aux-Loges fins au 6 d'agost 1645, quand son senhor, Roger II de Saint-Lary de Bellegarde (~1562-1646), que sa familha sortiá de Belagarda, dins lo Gers e de Sent Lari, dins la Nauta Garona, instaurèt lo nom novèl.