3. juni til 14. juli 1967 Bortsett frå «Good Vibrations»: Sporadisk frå 18. februar til 11. september 1966, delar av akkompagnementet til «Heroes and Villains»: Oktober 1966 og avsluttinga på «Vegetables»: April 1967
Smiley Smile er det tolvte albumet til The Beach Boys og kom ut i 1967. Albumet kom ut i staden for det mykje omtalte albumet Smile og vert rekna som underprodusert og då det kom ut vart det møtt med likegyldigheit og forvirring.[8] Statusen til Smiley Smile har likevel vokse med åra og det har vorte ein kultfavoritt.[8]
Historie
Etter «Good Vibrations» toppa singellistene seint i 1966 var det store forventningar til Smile-prosjektet.[9] Men i mai 1967 vart albumet avlyst og The Beach Boys trekte seg som ein av hovudattraksjonane på Monterey Pop Festival. Det opphavlege prosjektet (som tok lenger tid enn noko anna Beach Boys-album tidlegare) vart skrinlagt. Albumet vart hovudsakleg spelt inn i det nye heimestudioet til Brian Wilson i Bel Air i løpet av juni og juli, og inneheld forskjellige utgåver av songar som var meint for Smile («Heroes and Villains», «Wind Chimes», «Vegetables» og «Wonderful») og andre songar som raskt vart raska saman. Berre «Good Vibrations» er originalutgåva. «Good Vibrations» vart inkludert for å auke salstala, sjølv om Brian Wilson var sterkt imot dette.
Då Smiley Smile til slutt kom ut i september, etter månader med intensiv publisitet, var kritikarane stort sett lite entusiastiske og albumet nådde berre 41. plass i USA.[10] I Storbritannia gjorde albumet det noko betre nokre månader seinare og nådde 9. plass.
Smiley Smile vert rekna som det mest kontroversielle Beach Boys-albumet. Mange tilhengjarar meiner det var ein massiv fiasko, medan andre ser på det som eit av dei mest særeigne albuma i 60-åra. Pete Townshend frå The Who er kjend som ein stor tilhengjar av albumet, og det same er Robbie Robertson frå The Band.
Smiley Smile markerte starten på slutten for Brian Wilson som den kreative leiaren i The Beach Boys. Sjølv om albumet i hovudsak er produsert av han, var produksjonen for første gong tilskriven heile gruppa. Dei neste åra og albuma vart Wilson mindre og mindre involvert i musikkproduksjon, og det var først i 1976 med 15 Big Ones at Wilson igjen vart tilskriven som produsent.
Smiley Smile finst i dag på CD i lag med Wild Honey og bonusspor frå perioden. I Australia vart Smiley Smile gjeven ut som The Beach Boys.
