Mellom Nordfjordeid og Haus var vegen ferdig i 1928. Opphavleg var det ferjesamband vidare til Maurstad. Vegsamband til Maurstad vart gjennombrote i 1938.
Dagens veg mellom Grotli og Ospeli bru, Nye Strynefjellsvegen med tre tunnelar, vart opna i 1977. Den gamle hovudvegen vart turistveg og utgjer i dag riksveg 258. Begge vegstrekningane er føreslått verna i Nasjonal verneplan for vegar, bruer og vegrelaterte kulturminne.[1]
Strekninga mellom Stryn og Nordfjordeid med tilhøyrande tunnelar vart opna i 1992 etter at vegarbeidet vart starta i 1966. Første delstrekning var mellom Nordfjordeid og Hjelle.
Ny veg vestover frå Nordfjordeid med riksvegstandard og to tunnelar vart opna på slutten av 1990-talet. Den eine tunnelen, Erviktunnelen, har fortau for at skuleborn frå Ervik skal kunne gå trygt til skulen i Kjølsdalen.
