Westerwannen

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln Gemeen: Wannen
Inwahners:
Postleettall:	21776
Vörwahl:	04757
Geograafsche Laag:	Koordinaten:53° 44′ N, 8° 47′ O53° 44′ N, 8° 47′ O

Luftbild von Westerwannen von Süden keken (2013)

Westerwannen (hoochdüütsch Westerwanna) is en Dörp in de Gemeen Wannen in’n Landkreis Cuxhoben, Neddersassen.

Geografie

Westerwannen liggt an de Süüdkant von en Geestinsel in de Masch un dat Moor von Land Hadeln. De höögste Punkt von disse Geestinsel is de Grafenbarg, de op 20 Meter över NN liggt. En poor hunnert Meter in’n Süden von Westerwannen flütt de Emmelk langs. Dat Naturschuulrebeed Aßbütteler Moor liggt in’n Noordwesten von’n Oort.

De Naveröörd sünd Heernkoop un de Lee in’n Noorden, Kampen in’n Noordoosten, Oosterwannen in’n Oosten, Suurlee in’n Süüdoosten, Ahlen-Falkenbarg un Krümpel in’n Süüdwesten, Wanhöden in’n Westen un Seehusen un Füürsteed in’n Noordwesten.

Historie

In de Tied so 3500 bet 2800 v. Chr. sünd in’n Westen von’n Oort de Megalithanlagen bi Westerwannen boot worrn.

In dat Moor bi Westerwannen hebbt se en Holtidol funnen, dat 43,5 Zentimeter hoog is. Dat steiht nu in de Borg Beers utstellt. De Liev von dat Idol besteiht ut en groff bearbeidt Bahl, op den en rund Kopp ahn Gesicht sitt.

Bi Westerwannen is en Grafffeld mit Urnengräver ut de Völkerwannertied opgraavt worrn. Dat Grafffeld hett mehr as 3000 Gräver un höört to de gröttsten Urnengrafffeller in Noordeuropa. Na de Buckelurnen, de se dor funnen hebbt, hebbt se de Westerwannen-Grupp defineert, de en Reeg Grafffeller tohoopfött, de ähnlich utstatt sünd.

De Kapell von Suurlee is 1369 na Westerwannen ümleggt worrn.

Na’n Eersten Weltkrieg hett Willibald Hentschel sien Keim-Siedlung Niegard in’t Moor bi Westerwannen grünnt.

Verwaltungsgeschicht

De Oort hett vör 1852 to dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln. 1932 is dat Deel von’n Kreis Land Hadeln worrn un 1977 von’n Landkreis Cuxhoben.

Inwahnertall

Johr	Inwahners
1848-00-001848[1]	597 Lüüd, 119 Hüüs
1871-12-011. Dezember 1871[2]	616 Lüüd, 123 Hüüs

Religion

Westerwannen is evangeelsch-luthersch präägt un billt mit de Georgkark en egen Kaspel.

För de Kathoolschen is de Hillig-Krüüz-Kark in Oterndörp tostännig.

Kultur

Verenen

Westerwannen hett en egen Schützenvereen, de 1951 grünnt worrn is. De Freewillige Füürwehr tohoop mit Oosterwannen is 1929 grünnt worrn.

Infrastruktur

Verkehr

Westerwannen liggt an de Landsstraat 118, de in’n Noordoosten över Oosterwannen, Kampen un Neenkarken na Oterndörp an de Bundsstraat 73 ran löppt un in’n Süüdwesten över Krümpel, Niewohl un Debst na Bremerhoben. In’n Noordwesten löppt de Kreisstraat 5 över Füürsteed na de Worth, in’n Süüdoosten na Suurlee.

De nächste Bahnhoff is de Bahnhoff Oterndörp an de Nedderelvbahn, de so twölv Kilometer in’n Noordoosten liggt. De nächste Opfohrt op de Autobahn is de Opfohrt 3 Noordholt op de Autobahn 27 (Afsnidd Cuxhoben–Bremerhoben), de so negen Kilometer in’n Westen liggt.

Footnoten

1. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 157
2. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 150