Westerholt (hoochdüütsch Westerholz) is en Dörp un Oortschop in de Gemeen Scheeßl in’n Landkreis Rodenborg, Neddersassen. Bi de Oortschop Westerholt höört ok de lüttje Oort Bult un de Hoff Emmen mit to.
De Bullerbarg in’n Westen von Westerholt is een von de höögsten Bargen in’n Landkreis Rodenborg. In’n Süüdwesten liggt dat Naturschuulrebeed Stellmoor un Weichel.
De Naveröörd sünd Hetzweeg in’n Noorden, Bult un Westeresch in’n Noordoosten, Jeersdörp un Scheeßl in’n Oosten, Veersbrügg un Wohlsdörp in’n Süüdoosten, Rodenborg in’n Süden, Luhn un Stellmoor in’n Süüdwesten, Borchel un Emmen in’n Westen un Langenhörn in’n Noordwesten.
In’n Tweten Weltkrieg sünd 17 Soldaten ut Westerholt fullen oder vermisst.[1]
In de Franzosentied von 1810 bet 1814 hett de Oort to de Mairie Jeem in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Amtsvaagdie Scheeßl in dat Amt Rodenborg tohöört. Na 1885 weer dat in’n Kreis Rodenborg. 1977 is dat Deel von’n ne’en, grötteren Landkreis Rodenborg worrn.
Von 1964 bet 1974 weer de Gemeen Westerholt Maat von de Samtgemeen Scheeßl. De Oort is an’n 1. März 1974 Deel von de Gemeen Scheeßl worrn. Dorbi sünd de Gemeen Westerholt un de Samtgemeen Scheeßl oplööst worrn. Westerholt billt nu en Oortschop mit egen Oortsbörgermeester un en Oortsraad mit acht Liddmaten.
Westerholt is evangeelsch-luthersch präägt un höört to dat Kaspel von de Lucas-Kark in Scheeßl.
För de Kathoolschen is de Corpus-Christi-Kark in Rodenborg tostännig.
Gedenktafeln för de Fullenen ut de twee Weltkrieg’ hängt in Scheeßl in de Kark.
Westerholt hett en egene freewillige Füürwehr un en Schüttenvereen.
In’n Westen von Westerholt in Emmen liggt de Golfclub Wümm.
Dör Westerholt löppt de Kreisstraat 219, de in’n Noorden na Hetzweeg an de Landsstraat 131 ran geiht un in’n Süden bi Rodenborg an de Bundsstraat 71/75. Von de K 219 geiht na Oosten de K 216 af, de na Scheeßl an de B 75 löppt. Ans gifft dat lüttjere Straten na Borchel un Westeresch.
De nächste Autobahn is de Autobahn 1 (Afsnidd Hamborg–Bremen). De Opfohrt 48 Elsdörp liggt so teihn Kilometer in’n Noordwesten von Westerholt an de L 131.
De nächste Bahnhoff is so bi söven Kilometer wied weg in’n Oosten de Bahnhoff Scheeßl an de Bahnlien Hamborg–Bremen.
Fröher harr de Oort en Volksschool mi egen Klockentoorn. De School is vondaag dichtmaakt un dor is en Kinnergoorn ünnerbrocht. De Kinner gaht nu na de Grundschool Scheeßl.
Abbendörp-Hetzweeg | Badlsdörp | Jeersdörp | Oostervees | Scheeßl | Sootel | Westeresch | Westerholt | Westervees | Wittkopsbossel | Wohlsdörp