Walter Huston, eegentlich Walter Houghston (* 6. April 1884 in Toronto, Ontario; † 7. April 1950 in Hollywood, Los Angeles, Kalifornien), weer en kanaadsch Schauspeler, de as bedüüden Charakterdorsteller in' amerikaansch Film un Theater gull. De Vader vun den Speelbaas John Huston wunn 1949 den Oscar as best Nebendorsteller för sien Rull in Der Schatz der Sierra Madre.
Leven
Walter Huston hett tonächst Ingenieurswetenschapen studeert, bevör he as Schauspeler Karriere maaken dee. All 1905 weer he en bekannt Naam in' Vaudeville un kreeg eerste Angebote, in New York uptotreeden. In dat sülvig Johr hett he de Journalistin Ruth Gore heiraadt. Nah de Gebort vun sien Söhn John Huston 1906 hett he vörövergahnd as Kraftwerksingenieur arbeit. 1909 kehr he torüch in't Vaudeville un weer gau ok weer en spoodriek Entertainer. 1924 harr he mit dat Mr. Pitt endlich sien Dörbröök as dramatisch Schauspeler. Kört dorup wurr he för sien sensatschonelle Dorstellen in Desire Under the Elms vun Eugene O’Neill fiert.
Up den Hööchtpunkt vun sien Broadway-Karriere hett he sück 1929 den Exodus gen Westen anslooten, indem he in Hollywood sien Glück söch. Upträen in Gentlemen of the Press neben Kay Francis un as Abraham Lincoln in de Adaptschoon von D. W. Griffith hemm ut hüm woll en bekannt Naam, aber kien Star maakt. Untfräe mit de Rullen, de he kreeg, kehr he torüch an den Broadway, wo he mit Dodsworth vun Sinclair Lewis sein bit dorhen gröttsten Erfolg fiern kunn. In de Filmadaptschoon Zeit der Liebe, Zeit des Abschieds hett he 1936 ünner de Regie vun William Wyler sien Rull as spoodriek Industrieller, de en Levenskrise bewältigen muss, nahdem he opdeckt harr, dat sien Fru, speelt vun Ruth Chatterton, hüm nich mehr leev hett, wedderhalen. För sien intensiv Dorstellen wunn Huston 1936 as best Dorsteller den Pries vun de New Yorker Filmkritiker.
En noch grötteren Erfolg as Bühnenschauspeler harr he in dat Stück Knickerbocker Holiday, de sien Leed September Song to de Erkennensmelodie vun Huston wurrn sull. Sien Filmkarriere bleev aber ehrder minn, afsehn vun sien Upträe as Düvel in Der Teufel und Daniel Webster, en Adaptschoon vun de glieknamig Vertellsels vun Stephen Vincent Benét ünner de Regie vun William Dieterle, un as Geliebter vun Ona Munson as Mother Gin Sling in Josef von Sternberg sien Laatwark Abrechnung in Shanghai. 1949 wunn Walter Huston neben en Golden Globe ok den Oscar as bestr Nebendorsteller för sien Rull as erfohren Goldsöker in den Film Der Schatz der Sierra Madre ünner de Regie vun sien Söhn John Huston. Kört, nahdem de Dreiharbeiten to The Furies, in de he den Vader vun Barbara Stanwyck speel, afslooten weern, is he storven.
Filmographie (Utwahl)
Utteknungen
Literatur
- John Weld: September Song. An Intimate Biography of Walter Huston (= Filmmakers. Bd. 60). Scarecrow Press, Metuchen NJ u. a. 1998, ISBN 0-8108-3408-1.
Weblenken
