Schippdörp kummt 1139 as Schipthorpe toeerst in de Oorkunnen vör.
In’n Eersten Weltkrieg sünd 64 Soldaten ut Schippdörp (tohoop mit Schippdörperdamm) fullen oder vermisst un in’n Tweten Weltkrieg 101 (ahn Schippdörperdamm).[1]
1927 hett de Oort den Schippdörperdamm, de vörher to dat Dörp tohöört hett, an de Stadt Wersermünn afgeven un dorbi üm un bi de Hälft von de Inwahners verloren. 1929 is de lütte Oort Apeler Deel von de Gemeen Schippdörp worrn.
Dat Wapen von Schippdörp wiest op blauen Grund un över en Schildfoot von sülvern Wellenlienen en gollen Schipp mit sülvern Seils. Op de beiden Sieden sünd gollen Ohren mit ölven Köörn to sehn.
Dat Schipp (en Kogg) steiht as Symbool för den Naam von’n Oort.
Kultur
Denkmaals för de Fullenen ut de twee Weltkrieg’ staht bi de Kark.
Von 1971 bet 1994 weer Schippdörp Standoort von de Bundswehr. De 4. Batterie von de Floogafwehrraketengrupp 36 leeg in en Kasern in’n Oosten von Schippdörp. In de Gebüüd in de Heinrich-Mahler-Straat is vondaag en privat bedreven Seniorenzentrum ünnerbrocht.
Dör Schippdörp löppt de Kreisstraat 58, de in’n Westen na Bremerhoben geiht un in’n Süüdoosten na Sellst an de Landsstraat 143 ran. In’n Noordoosten geiht de K 60 na Bramel, Elm un Drangst.
De Kita in Schippdörp warrt von de evangeelsche Gemeen von de Martinskark bedreven. De Regenbagen-Kita mit 115 Plätz an de Brameler Straat 28 is in de Nacht von’n 4. op’n 5. November 2017 afbrennt.
Lüüd
De Politiker Karl Curdt is 1885 in Schippdörp boren un de plattdüütsche Schriever Karl Leifermann 1926.
Literatur
850 Jahre Schiffdorf - Geschichten und Geschichte eines Dorfes 1139 - 1989. Ditzen, Bremerhoben 1989
