PROFILBARU.COM

Ronald Harry Coase (* 29. Dezember 1910 in Willesden bi London, England; † 2. September 2013 in Chicago, Illinois^[1]) weer en britisch Weertschapswetenschapler. He kreeg 1991 den Nobelpries för Wertschapswetenschapen för „sien Opdecken un Klärung vun dat Bedüüden vun de so nömmt Transaktschonskosten un de Verfügensrechte för de institutschonelle Struktur un dat Funktschoneeren vun de Wertschap“, dat so nömmt Coase-Theorem.

Siet den Dood vun Rita Levi-Montalcini an’ 30. Dezember 2012 weer Coase de öldste levende Nobelpriesdräger.

Leven

Ronald Coase is in England upwussen un studeer van 1929 bit 1931 an de London School of Economics and Political Science (LSE). Sien wetenschaplich Loopbahn fung in Dundee un Liverpool an, he gung aber bald weer an de LSE torüch. 1951 wurr he to’n Perfesser vun de University of Buffalo, USA beropen, 1958 wessel he an de University of Virginia un 1964 keem he an de University of Chicago, deren Professor for Law and Economics he bit to sien Emeriteeren 1982 bleev. He weer Liddmaat vun de Mont Pelerin Society un wurr 1978 in de American Academy of Arts and Sciences upnommen. 1985 wurr he korrespondeerend Liddmaat vun de British Academy.^[2]

Coase is an’ 2. September 2013 in dat Öller vun 102 Johren storven.^[1]

Wark

De Naam Ronald Coase steiht in de wertschapswetenschaplich Diskussion vör allen för twee bahnbreken Upsatzen, up de wesentliche Theorien footen, mit de de Wertschapswetenschap hüüd argumenteert:

1937 hett Coase „The Nature of the Firm“^[3] verfaat, en Artikel, in de he ünner annern en Ünnernahmen as hierarchisch Verdragsgeflecht beschreev. Buterdem beschreev he de Existenz vun Ünnernahmen as Folg vun bi den Gebruuk vun Märkten uptreden Transaktschonskosten. Ofschons Coase later seggt hett, dat hüm de Folgen vun sien Gedankengang gor nich bewusst ween weern, gellt disse Artikel as Initialzündung vör de verdragsorienteert Betrachtung vun dat wertschaplich Hanneln, de later in de Theorien vun de Nee Institutionenökonomik ehr Daalslag funnen. Hierto hörrn de „Theorie der unvollständigen Verträge“, de Transaktschonskostentheorie un de Prinzipal-Agent-Theorie.

Coase hett sück 1960 weer mit en verdragstheoretisch Thema befaat un beschreev in „The problem of social cost“ de Schwierigkeiten, de externe Effekte vun wertschaplich Hanneln utlösen, wenn de bedrapen Eegendomsrechte nich klor towiest sünd. Disse Upsatz, en Mielensteen in de Theorie vun de Verfügensrechte (property rights theory), hett de nahfolgen Debatten beinfloot un warkt bit hüüd, etwa in den Beriek vun den Umweltschuul, de sien Emissionsrechtehandel up dat nah hüm nömmt Coase-Theorem torüchgahn.

In den Beriek vun de Mikroökonomie hett he sück ünner annern mit dat Preissettensverhollen vun en Monopol, dat langlevend Wertschapsgöder herstellt, befaat. Cotas hett vermoot, dat sück en sückser Monopolist in’ Grenzfall as bi en vullständigen Wettbewarf verhollen deiht, wiel de Anbeder över mehrere Perioden weg mit sück sülvst konkurreert (Coase-Vermooden).

Wiels sien Tiet as Perfesser in Chicago hett he dat renommeert Journal of Law and Economics herutgeven. Sien Arbeiten, insbesünnere „The Nature of the Firm“, gellen as Grundsteen vun de Nee Institutschonenökonomik.

Schriften

The Nature of the Firm. In: Economica. New Series, Vol. 4, No. 16 (Nov., 1937), pp. 386-405. doi:10.1111/j.1468-0335.1937.tb00002.x.
The Problem of Social Cost. In: Journal of Law and Economics, Vol. 3 (1960), pp. 1–44.

Weblenken

DNB-Katalog
Informatschonen to Ronald Coase up de Sieden vun den Nobelpries (engelsch)
www.coase.org - Das Ronald-Coase-Institut mit Biographie un Bibliographie

Enkeld Nahwiesen

↑ ^a ^b University Of Chicago News Office: Ronald H. Coase, Founding Scholar in Law and Economics, 1910-2013. Nahroop vun de University of Chicago. 2. September 2013. Afropen an’ 3. September 2013.
↑ Deceased Fellows. British Academy, afropen an’n 15. Mai 2020.
↑ Coase, Ronald (1937) The Nature of the Firm, in Economica 4(16): 386-405. [1]