De vörige Wahl weer 2015, de nächste Wahl schall denn 2025 ween.
Achtergrund
De vörige Wahl weer an’n 4. November 2015 un de Natschonaalversammlung is an’n 13. November 2015 toeerst tohoopkamen. De Verfaten von Belize leggt fast, dat de Natschonaalversammlung nich later as fiev Johr na dat eerste Tohoopkamen oplööst warrn mutt. De Neewahlen mööt denn binnen dree Maand afhollen warrn. Dormit weer vörgeven, dat de Wahl nich later ween kann as an’n 13. Februar 2021. De Frist von dree Maand sünd en Maximaaltied, de normalerwies nich utschöppt warrt. Dorüm sünd de Wahlen för November 2020 ansett.
Nadem dör de COVID-19-Pandemie lang nich kloor weer, wannehr de Wahlen ween schöölt, hett Dean Barrow an’n 5. Oktober 2020 bekannt maakt, dat de Termin för de Wahl de 11. November 2020 ween schall.[2]
Premierminister Dean Barrow kunn nich wedder bi de Wahl antreden, denn he harr siene maximale Amtstied von dree Wahlperioden reckt.
UDP-Kannedaat
Dean Barrow dröff nich wedder as Premierminister antreden. De Kannedaten för sien Nafolg mit de besten Utsichten weren Patrick Faber un John Saldivar. De Parteidag üm de Nafolg to regeln, weer för de Midd von dat Johr 2019 plaant, aver in’n Januar 2019 is bekannt maakt worrn, dat de Parteidag op’n 9. Februar 2020 verschaven warrn schull. Bi’n Parteidag an’n 9. Februar hett sik denn Saldivar dörsett. Aver al dree Daag later hett he düt Amt wedder dalleggt, nadem rutkamen weer, dat Saldivar in de USA Lev Dermen drapen un woll 50.000 Dollar von em annahmen harr. Dermen weer to de Tied in Salt Like City as Bedreger anklaagt un is later ok veroordeelt worrn.
En ne’en Parteidag is denn för’n 5. April 2020 ansett worrn, kunn aver dör de COVID-19-Pandemie nich afhollen warrn. De Parteidag is toletzt an’n 12. Juli 2020 afhollen worrn. Dorbi stünnen Faber, Saldivar un Wilfred Elrington to Wahl. Elrington hett man 10 Stimmen kregen un Faber hett sik mit 286 to 267 Stimmen gegen Saldivar dörsett. Faber hett dat Amt as Parteibaas an’n 9. Oktober övernahmen.
PUP-Kannedaat
Designeerten PUP-Kannedaat för dat Amt as Premierminister weer Johnny Briceño, de siet 2015 Parteibaas von de PUP is. He kunn sik bi de Wahl dörsetten.
.jpg)
