De Belize Progressive Party (BPP) is en politsche Partei in Belize, de sik an’n 30. September 2015 billt hett. De Partei hett ehren Seet in Belmopan un de Parteibaas is Patrick Rogers (Stand 2019).
Programm
Dat Parteiprogramm is soziaaldemokraatsch. De Partei will Belize (opstunns en konstitutschonelle Monarchie) in en Republik mit en Präsident ümwanneln. Vör allen will de Partei aver dat Twee-Partein-System von Belize (UDP un PUP) opbreken, dat de BPP för korrupt höllt, un en drüdde Kraft etableren.
Historie
De Partei hett sik 2015 billt, as sik de People’s National Party, dat We the People Reform Movement un Delen von de Partei Vision Inspired by the People tohoopdaan hebbt.
Wahlen
De Partei is toeerst bi de Parlamentswahl 2015 antreden. De 25 Kannedaten, de de Partei in de 31 Wahlkreise von Belize opstellt hett, hebbt bi de Wahl 1,65 % von de Stimmen kregen. Dör dat Mehrheitswahlrecht in Belize kunn de Partei aver keen Kannedaten in dat Repräsentantenhuus bringen.
Bi de Stadtraadswahlen 2018 hett de Partei Kannedaten in veer von de negen Städer (Belize-Stadt, San Ignacio/Santa Elena, Belmopan un Punta Gorda) opstellt, aver ok bi düsse Wahl kunn sik keen von de Kannedaten dörsetten.
Weblenken
