Oolwarder leeg fröher as Warder in dat Binnendelta von de Elv twüschen (Ole) Süderelv, Köhlfleet un Köhlbrand. Dör Havenboarbeiden is de Ole Süderelv in’n Süden von Oolwarder kumplett verswunnen un de Warder is nu Deel von dat faste Land.
Dat Rebeed von Oolwarder weer bet 1248 Deel von Gorieswarder. Bi de Allerkindleinsflood 1248 is Gorieswarder uteneenbraken un Oolwarder weer en Insel för sik. De öllsten Oorkunnen, in de Oolwarder vörkummt, hebbt keen Datum. Historikers dateert disse Oorkunnen aver in de Tied üm 1250.
Dör Stormfloden weer en Deel von dat Land unbewahnbor un dorüm hebbt de Arzbischop von Bremen (as Landsherr von dat Stift Bremen) un de Hartog von Bruunswiek-Lümborg an’n 27. Februar 1418 en Verdrag slaten, dat Rebeed nee intodieken. De eerste Nawies för en Kark in Oolwarder is von 1436.
Fröher hett dat Eiland un de Hoff Krusenbusch ok mit to Oolwarder höört.
Mit dat Gesett över de Havenerweiterung hett de Stadt Hamborg von 1961 af an anfungen, Grundstücken optoköpen un de Inwahners ümtosiedeln. Von 1973 sünd denn ok in groten Stil Hüüs afreten worrn. Mit dat twete Gesett över de Havenerweiterung von’n 20. Januar 1982 weer dat Enn von Oolwarder denn kumplett beslaten. 1989 stünnen blots noch ölven Gebüüd.
De Oort hett vör de Tied üm 1765 rüm de Vaagdie Oolwarder in dat Amt Horborg billt un weer denn von 1765 af an in de Vaagdie Oolwarder un Finkwarder. Na 1885 weer dat in’n Kreis Horborg un na 1932 in’n ne’en, grötteren Kreis Horborg.
Gedenktafeln för de Fullenen ut den Düütschen Krieg, den Düütsch-Franzööschen Krieg un de twee Weltkrieg’ hängt in Oolwarder in de Kark. För de Fullenen ut’n Eersten Weltkrieg steiht tosätzlich en Denkmaal vör de Kark.
Weertschop un Infrastruktur
2009 sünd in Oolwarder twee EnerconE-126 Windkraftanlagen boot worrn, de mit 6 Megawatt un en Höögd von 198,5 Meter to de höögsten Bowarken in de Hansestadt Hamborg höört.[9]
Iesenbahn-Personenverkehr hett dat in Oolwarder nie nich geven. Dör den Oort löppt aver de Hambörger Havenbahn för den Industrieverkehr in’n Haven. De Bahnhoff Ole Süderelv is 1995 op Oolwarder Grund boot worrn.
Literatur
Gustav Wülfken: So schön war Altenwerder. Verlag Uwe Herbst, Neegraven 1989
↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 45: http://books.google.de/books?id=Q 5OAAAAcAAJ&pg=PA45
