Laag von Moorborg in Hamborg (Koort lett sik anklicken)
Moorborg (hoochdüütschMoorburg) is en Stadtdeel in’n Bezirk Horborg von de Stadt Hamborg. De Oort hett 729 Inwahners (Stand 31. Dezember 2010) op en Rebeed von 10 km².
Geografie
Moorborg liggt in de Masch an dat linke Över von de Süderelv un man knapp höger as de See. Deelwies is dat Rebeed ok moorig. De höögste Punkt is de Moorbörger Barg mit 21,9 m över de See. Na Süden hen to liggt de Horbörger Bargen.
Dat Rebeed von Moorborg hett toeerst Glindesmoor heten. 1309 kummt de Kark toeerst in de Oorkunnen vör, as Dochterkark von Wilsdörp.
Dat Rebeed von Moorborg is 1375 Besitt von de Stadt Hamborg worrn. Dat weer dormaals dat Ole Moor un de Reetwisch, de de Hambörgers köfft hebbt un dor 1390 denn en Borg boot hebbt, de Hamborg de Kuntrull över de Süderelv sekern un dat Hambörger Stapelrecht dörsetten helpen schull. Disse Borg hett denn Moorborg heten. Bet to dat Groot-Hamborg-Gesett von 1937 weer Moorborg ok de eenzigste Deel von Hamborg, de in’n Süden von de Elv leeg.
De ole Süderelv twüschen Moorborg un Oolwarder is na de Stormflood 1962 dichtschüddt worrn. Dat Elvwater flütt nu över den Köhlbrand af.
Moorborg is von de Stadt Hamborg as Hafenerweiterungsgebiet utwiest worrn un de Stadt hett en Barg Hüüs opköfft. Dorüm is de Inwahnertall von Moorborg över de Tied bilütten dalgahn.
Moorborg is evangeelsch-luthersch präägt un billt mit de Maria-Magdalena-Kark en egen Kaspel. Dat eerste Maal warrt 1309 von en Kark in Moorborg snackt. De ole Kark stünn op en Warft an’n Moorbörger Karkdiek. De hüdige Kark is 1597 boot worrn.
Stormfloden
Bi de Wiehnachtsflood 1717 stünn ok Moorborg ünner Water un opminnst een Minsch is dor bi verdrunken. Ok bi de Nachtflood an’n 25/26. Februar 1718 sünd wedder Minschen verdrunken. Bi de Flood an’n 2./3. März 1791 is de Diek an twee Steden in Moorborg braken. Ok bi de Floden an’n 10. bet 12. Dezember 1792 un 3. März 1793 is dat Water över de Dieken gahn.
Bi de Flood von’n 3./4. Februar 1825 is dat Huus von Familie Harms wegspöölt worrn un een Dochter verdrunken. Bi de Flood an’n 28. März 1845 is de Diek wedder braken un Moorborg stünn ünner Water.
Bi de Flood von 1962 is de Diek an 18 Steden braken un ölven Lüüd sünd verdrunken.
Kultur
In Moorborg op’n Karkhoff gifft dat en Denkelsteen för de Fullenen ut de Freeheitskrieg’ 1814 (as bi en Gefecht üm de Moorbörger Schanz ölven Soldaten fullen sünd) un ok en Denkmaal för de Fullenen ut de twee Weltkrieg’.
Verenen
De Schützenvereen Moorborg is 1903 grünnt worrn un de Turn- un Sportvereen 1897. De Freewillige Füürwehr is 1893 grünnt worrn.
Weertschop un Infrastruktur
Energie
In’n Süüdwesten von Moorborg liggt en 380-kV-Höögstspannungs-Schaltanlaag.
Von 1974 bet 2001 hett dat Gaskraftwark Moorborg mit 1000 MW von de HEW lopen. De Schosteen von dat Kraftwark weer mit 256 m bet 2004, as he sprengt worrn is, dat höögste Bowark in Hamborg.
Dör Moorborg löppt de Autobahn 7 mit en egen Opfohrt (Opfohrt 31 Moorborg). De A 7 löppt in’n Noorden dör den Elvtunnel na Hamborg un is in’n Süden mit de A 1 verbunnen. An’n Süüdrand von Moorborg löppt de Bundsstraat 73 langs, de von de A 253 von Horborg un Heimfeld in’n Oosten kummt un denn in’n Westen över Huusbrook, Neegraven un Fischbeek na Vosshusen un Buxthu löppt.
↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 59: http://books.google.de/books?id=Q 5OAAAAcAAJ&pg=PA59
