Offenwarden

Wapen/Flagg	Koort
Basisdaten
Bundsland: Neddersassen Landkreis: Cuxhoben Gemeen: Hagen
Flach:	8,49 km²
Inwahners:	175 (2017-11-2727. November 2017)
Inwahnerdicht:	20,6 Inwahners pro km²
Hööchd:	3 m över NHN
Postleettall:	27628
Vörwahl:	04702
Geograafsche Laag:	Koordinaten:53° 20′ N, 8° 32′ O53° 20′ N, 8° 32′ O
Laag von Offenwarden in de Gemeen Hagen (Koort lett sik anklicken)

Luftbild von en Deel von Offenwarden (von Westen keken, 2012)

Offenwarden un de Seen vör’n Diek (von Süüdwesten keken, 2012)

Offenwarden (hoochdüütsch Offenwarden) is en Dörp in de Gemeen Hagen in’n Landkreis Cuxhoben, Neddersassen. Binnen de Gemeen billt de Oort en egen polietsche Oortschop.

Bi Offenwarden höört ok de lüttjere Oortsdeel Offenwardermoor mit to.

Geografie

De Oort liggt in de Masch von Oosterstood direkt achtern Diek von’n Rechten Arm von de Werser, de dör Harriersand von’n Hauptstroom von de Werser aftrennt is. Dat Water ut dat Rebeed warrt över Fleten un Gravens na de Werser hen afföhrt.

De Naveröörd sünd Saans in’n Noorden, Saanstermoor un Offenwardermoor in’n Noordoosten, Uthleererbarg in’n Oosten, Weersbermoor un Rechtebermoor in’n Süüdoosten, Weersbe un Rechtebe in’n Süden un de Noordspitz von Harriersand in’n Westen.

Historie

Offenwarden kummt 1105 as Uffenwurthe toeerst in en Oorkunn von’n Bremer Arzbischop Friedrich I. vör.

In’n Eersten Weltkrieg sünd 13 Soldaten ut Offenwarden fullen oder vermisst un in’n Tweten Weltkrieg 15.^[1]

Verwaltungsgeschicht

In de Franzosentied hett de Oort toeerst 1810 bet 1811 binnen dat Königriek Westfalen to de Mairie Weersbe in’n Kanton Hagen höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Weersbe in’n Kanton Hagen.

De Oort hett vör 1885 to’n Bezirk Süüd-Oosterstood von dat Amt Hagen tohöört. Na 1885 weer dat in’n Kreis Geestmünn. 1932 is dat Deel von’n Landkreis Wersermünn worrn un 1977 von’n Landkreis Cuxhoben.

De Oort weer fröher en egenstännige Gemeen. 1968 müss de Oort aver de Egenstännigkeit opgeven un is Deel von de Gemeen Saans worrn. An’n 1. Januar 2014 is de Gemeen Saans denn tohoop mit de ganze Samtgemeen Hagen oplööst un Deel von de ne’e Gemeen Hagen worrn. Sietdem is Offenwarden wedder von Saans aflööst un billt binnen de Gemeen en Oortschop mit egen Oortsvörsteiher.

Inwahnertall

Johr	Inwahners
1791-00-001791[2]	49 Füürsteden
1812-00-001812[3]	289
1824-00-001824[4]	49 Füürsteden
1848-00-001848[5]	269 Lüüd, 47 Hüüs
1871-12-011. Dezember 1871[6]	222 Lüüd, 46 Hüüs
1885-12-011. Dezember 1885[7]	236 Lüüd, 42 Hüüs
1905-12-011. Dezember 1905[8]	236 Lüüd, 44 Hüüs
1910-12-011. Dezember 1910[9]	359*
1925-00-001925[10]	367*
1933-00-001933[10]	325*
1939-00-001939[10]	299*

* tohoop mit Offenwardermoor

Religion

Offenwarden is evangeelsch-luthersch präägt un höört to dat Kaspel von de Johannes-de-Döper-Kark in Saans. Bet in dat 19. Johrhunnert rin weer de Oort aver noch opdeelt. De halve Deel hett to dat Kaspel Saans höört un de annere Deel to dat Kaspel von de Marienkark in Weersbe.

För de Kathoolschen is de Hillig-Hart-Jesu-Kark in Geestmünn tostännig.

De Doden warrt op’n Karkhoff Saans begraven.

Wapen

Dat Wapen von Offenwarden wiest op blauen Grund över en gröne Wort in’n Schildfoot en Neddersassenhuus mit sülvern Fackwark un gollen Dack.

Utklamüsert hett dat Wapen de Heraldiker Albert de Badrihaye. De Badrihaye betüht sik mit dat Wapen op’n Naam von’n Oort, de bi Luneberg Mushard as Up de Wort interpreteert worrn is.

Oortsvörsteihers

• 1. Januar 2014–: Jörg Weber (CDU)
• opstunns: Harm von Hollen (CDU)

Kultur

En Denkmaal för de Fullenen ut de twee Weltkrieg’ steiht in Offenwarden an de Hauptstraat.

Verenen

De Schüttenvereen Offenwarden is 1951 grünnt worrn.

Weertschop un Infrastruktur

Offenwarden hett en egene freewillige Füürwehr.

Verkehr

Dör Offenwarden löppt de Kreisstraat 50, de in’n Noorden na Saans, Rechtenfleth un Neenlann geiht un in’n Süden na Weersbe un Rechtebe an de K 49. De K 49 wedder föhrt von Rechtebe in’n Oosten na Uthleer an de Landsstraat 134 un in’n Süden över Aschwarden na Rade un Ne’enkarken.

De nächste Autobahn is de Autobahn 27 (Afsnidd Bremen–Bremerhoben). De Opfohrt 12 Hagen liggt so söven Kilometer in’n Noordoosten von Offenwarden an de K 51.

De nächste Bahnhoff is so bi 18 Kilometer wied weg in’n Süden de Bahnhoff Farge an de Bahnlien Farge–Vesack. Dor föhrt de Lien RS 1 von de Regio-S-Bahn Bremen/Neddersassen, de von Farge bet na Veern geiht. De Bahnhoff Lübbs an de Bahnlien Bremen–Bremerhoben is so bi 21 Kilometer wied weg in’n Oosten. Von 1911 bet 1931 harr de Oort en egen Bahnhoff an de Nedderwerserbahn.

Scholen

Na School gaht de Kinner op de Grundschool Uthleer un na Hagen för de annern Schoolformen. Bet 2008 sünd de Schölers noch op de Grundschool in Weersbe gahn, de denn aver dichtmaakt hett.

Footnoten

1. Onlineprojekt Gefallenendenkmäler
2. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 173
3. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
4. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 460
5. Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 155
7. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 164
8. Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 52
9. Inwahnertallen op gemeindeverzeichnis.de
10. Inwahnertallen op verwaltungsgeschichte.de

Weblenken

Offenwarden. Mehr Biller, Videos oder Audiodateien to’t Thema gifft dat bi Wikimedia Commons.

Oortschoppen un Öörd in de Gemeen Hagen

Albst (mit Büggeln) | Braamst (mit Braamst, Braamstermoor, Bremerhorn, Finn, Finterbarg, Gackau, Harndorp, Loh un Wittst) | Dörphagen | Driftseth (mit Dannendörp, Rechtenflethermoor un Wittenbarg) | Hagen (mit Börsten un Harmonie) | Hein (mit Vosloog) | Hoop (mit Seelhorn) | Kassbrook (mit Grienenbargshusen un Kassbroker Heid) | Leernst (mit Born, Düngel, Neenhusen un Seedörp) | Offenwarden (mit Offenwardermoor) | Rechtenfleth (mit Blömkenmoor, Dreptersiel un Feldhoff) | Saans (mit Saanstermoor) | Uthleer (mit Cleve un Uthleererbarg) | Weersbe (mit Weersbermoor) | Wolsbuddel (mit Heesen un Woldar) | Wortfleet (mit Rechtebe un Rechtebermoor)