Nee Eversdörp (hoochdüütsch Neu Ebersdorf) is en Dörp in de Gemeen Eversdörp (Samtgemeen Geestborn) in’n Landkreis Rodenborg, Neddersassen.
Geografie
De Meh hett ehren Born bi Nee Eversdörp. In’n Süden liggt de Hinzel.
De Naveröörd sünd Doornsood un Alfs in’n Noordoosten, Eversdörp in’n Oosten, Örel in’n Süüdoosten, Hipst in’n Süden, Op de Hööv mit Drüddgeest in’n Westen un Olenstöhlen, Olenkamp, Lüttenhain un Grotenhain in’n Noordwesten.
Historie
Nee Eversdörp is eerst na’n Eersten Weltkrieg grünnt worrn, op en Stück Moor- un Heidland, dat nee kultiveert worrn is.
Verwaltungsgeschicht
De Gemeen Nee Eversdörp is 1924 grünnt worrn un leeg in’n Kreis Bremervöör. 1932 is dat Deel von’n ne’en, grötteren Kreis Bremervöör worrn un 1977 von’n Landkreis Rodenborg.
De Oort is 1966 Liddmaat von de Samtgemeen Eversdörp worrn. Mit de Gemeenreform in Neddersassen to’n 1. März 1974 is de Samtgemeen oplööst un Nee Eversdörp Deel von de Gemeen Eversdörp worrn.
Religion
Nee Eversdörp is evangeelsch-luthersch präägt un höört to dat Kaspel von de Bethlehem-Kark in Hipst. Vör 1961 hett de Oort to dat Kaspel von de Kark in Örel höört.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
Kultur
Verenen
Nee Eversdörp hett en egene freewillige Füürwehr.
Weertschop un Infrastruktur
Verkehr
Dör Nee Eversdörp löppt de Kreisstraat 124, de in’n Süüdwesten an de K 116 geiht un in’n Noordoosten an de Landsstraat 119 ran.
De nächste Autobahn is de Autobahn 27. De Opfohrt 8 Geestmünn liggt so 30 Kilometer in’n Westen von Nee Eversdörp.
De nächste Bahnhoff is so bi fiev Kilometer wied weg in’n Süden de Bahnhoff Op de Hööv an de Bahnlien Bremerhoben–Buxthu.
Scholen
De Schölers ut’n Oort gaht na de Grundschool Eversdörp/Alfs in Eversdörp. Later wesselt se na Oberschool op de Geestborn-School in Örel oder na dat Gymnasium Bremervöör.
