De Bethlehem-Kark is de Kark von dat evangeelsch-luthersche Kaspel Hipst (Karkenkreis Bremervöör-Zeven). De Karkengemeen hett üm un bi 1500 Liddmaten.
Historie
Dat Kaspel Örel weer temlich groot un wietlöftig. Dorüm hett de Karkengemeen bi de Landskark in Hannover en Andrag stellt, dat se en twete Kark boon dröfft. Nadem de Landskark sik inverstahn wiest hett, hett de Karkenvörstand an’n 10. Januar 1958 afstimmt, woneem de Kark boot warrn schull.[1] Alfs un Eversdörp wullen de Kark geern in Eversdörp hebben, denn de beiden Öörd weren jüst so wied von Örel weg as Hipst. Hipst hett sik aver mit een Stimm Vörsprung dörsetten kunnt.
As Boplatz harr de Karkenvörstand sik dat Grundstück gegenöver von dat Gasthuus Köster utkeken. Wilhelm Köster hett dat 0,3963 Hektar grote Grundstück denn gegen en Stück Holtland in de Raffheid tuuscht. As Architekt is Johannes Stahmann ut Buxthu beopdragt worrn.
De Grundsteen is an’n 6. November 1958 leggt worrn. Dat Richtfest weer denn al an’n 20. Dezember 1958. 1960 weer de Kark trech un is an’n 22. Januar von Landsbischop Johannes Lilje wieht worrn.
Egenstännige Gemeen is de Kark Anfang 1961 worrn.
En Örgel mit 9 Registers hett de Kark 1963 kregen. Boot hett se Paul Ott Orgelbau.
Pastoorn
- 1960–1987: Fritz Brandt
- –2011: Rainer Müller-Jödicke
- opstunns: Martina Scholz-Mehrtens
Kaspel
To dat Kaspel Hipst höört de Öörd Hipst, Frellsdorp, Op de Hööv un Nee Eversdörp.
De Naverkaspels sünd Örel in’n Oosten, Öös in’n Süüdoosten, Beverst in’n Süüdwesten, Oolluunbarg in’n Westen, Ringst in’n Noordwesten un Loomst in’n Noorden.
- ↑ Heinrich Krankenberg: Hipstedt: Geschichte eines Dorfes zwischen Geest und Moor. 2008, Sied 221ff.
Weblenken
Koordinaten:53° 30′ N, 8° 58′ O
