Martin Harnik (* 10. Juni 1987 in Hamborg) is en öösterriekschen Footballspeler. He is to glieke Tied ok noch düütschen Staatsangehörigen. In de In'n Momang speel he för den VfB Stuttgart in de Football-Bundsliga.
In’n Vereen
Harnik hett 1992 in Hamborg mit dat Footballspelen anfungen. Dormols weer he bi’n TSV Karkwarder. De Vereen hett sik later mit de SpVgg Ossenwarder-Moorfleet tosamendaan to’n SC Veer- un Maschlann. In de Winterpaus vun de Saison 2006/2006 is Harnik na Bremen gahn. Dor hett he toeerst in de Regionalligamannschop vun den SV Werder speelt un 13 Spelen mitmaakt. Lehrt hett he Störmer. En Johr later traineer Harnik al bi de Profis mit, as he sik den Middelfoot braken hett. Dor konn he denn meist de ganze Trüchrunn nich mitspelen. To de Speeltied 2007/2008 hett he bi Werder en Profiverdrag unnerschreven bit 2010.
To’n eersten Mol bi de Profis insett wurrn is he, as he an’n 15. August 2007 in de Qualifikatschoon för de Champions-League inwesselt wurrn is.
In de Football-Bundsliga hett he to’n eersten Mol an’n 25. August 2007 mitspeelt. Dormols is he in de 61. Minuut gegen den 1. FC Nürnbarg bröcht wurrn. Sien eerst Door hett he denn glieks in de 69. Minuut schaten. Dat bedüüd denn amenne ok den 1:0-Sieg gegen den „Club“. Ok in de Afwehr up de Butenbahn is Harnik in Bremen jummers mol wedder kort bröcht wurrn.
A'n 30. August 2009 is he na Fortuna Düsseldörp utlehnt wurrn, de just in de 2. Bundsliga upstegen weer.[1] Dor hett he wedder as Störmer speelt un ok allerhand Dore schaten. An'n 26. April 2010 hett he bekannt maakt, he woll den Vereen wedder verlaten.[2] To de Speeltied 2010/2011 is he na den VfB Stuttgart wesselt. Dor hett he en Verdrag bit 2013 unnerschreven.[3]
Natschonalmannschop
Martin Harnik siene Mudder is ut Düütschland (Hamborg), man sien Vadder kümmt ut Graz. Dor harr he woll ok for düütsche Jöögd-Mannschoppen spelen konnt. Man he hett sik vörnahmen, he woll för Öösterriek spelen, ofschoonst he nie nich in Öösterriek leevt hett. He meen, he harr den öösterriekschen Footballbund allerhand to danken.[4] Aktuell (21.11.2011) hett he 27 Lännerspele för Öösterriek makt.
In sien eerst Speel för Öösterriek gegen Tschechien an’n 22. August 2007 is he in de 72. Min. inwesselt wurrn. As he in de 78. Min. to’n tweeten Mol den Ball kreeg, hett he foorts dat Door to’n 1:1 schaten. De Trainer Josef Hickersberger hett Harnik ok för de Mannschop bi de Football-Europameesterschop 2008 in Öösterriek un de Swiez beropen. Dat güng in de Vörrunn gegen Düütschland, Polen un Kroatien. Al Spelen hett Harnik mitmaakt, man sien Team is denn doch utscheden.
Wat he schafft hett
- U20 Weltmeesterschop 2007 in Kanada (4. Platz)
- Europameesterschop 2008 in Öösterriek un de Swiez (Vörrunn)
Borns
- ↑ fortuna-duesseldorf.de: Martin Harnik kommt zu Fortuna Düsseldorf
- ↑ fortuna-duesseldorf.de:Martin Harnik verlässt die Fortuna vun'n 26. April 2010
- ↑ vfb.de:Verstärkungen für den VfB vom 13. Mai 2010
- ↑ werder.de: "Deutschland oder Österreich – schwere Entscheidung!"
Weblenks
