De Oortschop geiht trügg op dat Kaspel von de Bartelmees-Kark in Imßen. Dor hebbt fröher de Öörd Imßen, Dingen, Weddewarden, Weddewarderbüttel, Brinkamahoff un Leps tohöört. Dat Kaspel weer toglieks de polietsche Gemeen. Leps is bi en Stormflood in de Noordsee ünnergahn un Weddewarden un de Brinkamahoff sünd 1927 an Bremerhoben fullen. De dree Öörd, de nableven sünd, hebbt de Gemeen Imßen billt. De Gemeen hett sik 1971 de Samtgemeen Langen anslaten.
Mit de Gemeenreform in Neddersassen to’n 1. März 1974 is de Samtgemeen wedder oplööst worrn un de Gemenen, de dor in tohoopslaten weren, sünd mit de Gemenen von de Samtgemeen Niewohl to de Gemeen Langen tohoopgahn. Binnen de Gemeen Langen hett Imßen denn en Oortschop mit egen Oortsraad mit fiev Maten un en Oortsbörgermeester billt. Ok nadem de Gemeen Langen to’n 1. Januar 2016 mit de Samtgemeen Beers tohoopgahn un Deel von de Gemeen Geestland worrn is, billt Imßen wieder en Oortschop.
