De Oort liggt in de Masch in’n Süden von Land Wusten un is en beten mehr as een Kilometer von de Butenwerser/Noordsee af. Dat Water ut dat Rebeed flütt över Gravens na’n Wallsgroov hen af.
Nadem de Oort Weddewarden 1927 an Bremerhoben fullen is, bestünn de polietsche Gemeen Imßen, de sik ut dat Kaspel Imßen billt harr, blots noch ut dat Dörp Dingen un de twee temlich lüttjen Öörd Imßen un Weddewarderbüttel. Dorüm is denn faken ok dat Dörp Dingen eenfach blots Imßen nöömt worrn.
De Windmöhl an’n Süüdrand von dat Dörp keem in dat 17. Johrhunnert toeerst in de Oorkunnen vör un is na 1945 afreten worrn.
De Oort hett bet 1852 to dat Kaspel Imßen in dat Vaagdiegericht Land Wusten tohöört. Von 1852 bet 1885 weer dat in dat Amt Dorum un denn in’n Kreis Leh. Von 1932 bet 1977 hett de Oort to’n Kreis Wersermünn höört un sietdem to’n Landkreis Cuxhoben.
Dingen is evangeelsch-luthersch präägt. Bet 1877 sünd de Lüüd ut Dingen in Imßen na de Bartelmees-Kark gahn. In dat Johr is de Zionkark in Weddewarden trech worrn, wat nu de Kark von dat Kaspel Imßen is.
Kultur
Verenen
De Schüttenvereen Imßen is 1924 grünnt worrn un de TSV Imßen 1892. De Verenen verstaht sik all beid as Vereen för all Öörd von dat ole Kaspel.
Dingen liggt an de Landsstraat 129, de in’n Noorden na Wreem, Mulsen, Dourm un Millm geiht un in’n Süüdoosten över Weddewarden na Speckenbüttel. Von Dingen ut na Oosten löppt de Noorderweg, de in Langen an de L 135 ran geiht.
De nächsten Bahnhööv sünd an de Bahnlien Bremerhoben–Cuxhoben. De Bahnhoff Wreem is so bi söven Kilometer wied weg in’n Noordwesten un de Bahnhoff Leh üm un bi acht Kilometer in’n Süüdoosten. Bet 1975 harr Dingen ok sülvs en lütten Bahnhoff an disse Bahnlien.
