Glenn Derick Godfrey (* 7. Juni 1949 in Belize-Stadt) is en Jurist, Schriever un Politiker ut Belize (PUP).
Leven
Godfrey is 1949 in Belize-Stadt boren. He hett an de Xavier University of Louisiana in New Orleans engelsche Literaturwetenschoppen studeert un dor 1971 en Bachelor of Arts maakt.[1] 1973 keem dor en Master of Arts in engelsche Literaturwetenschoppen an de Stanford University in Palo Alto to.[1]
Godfrey weer von 1973 bet 1975 as Writer in Residence Dozent för Engelsch an de Xavier University of Louisiana.[1]
1977 hett Godfrey en Bachelor of Law in Juristeree an de University of the West Indies in Cave Hill (Barbados) maakt un 1979 sien Legal Education Certificate an de Norman Manley School of Law in Mona (Jamaika) kregen.[1] Na dat Studium hett he 1979 en egen Kanzlie in Belize-Stadt grünnt.
Politik
Bi de Parlamentswahl in Belize 1989 weer he Kannedaat för de PUP in’n Wahlkreis Belize-Land Süüd un hett de Wahl mit 64,8 % von de Stimmen gegen Rudolph Thompson von de UDP wunnen. Bi de Wahl 1993 weer he in’n sülven Wahlkreis wedder Kannedaat un hett sik mit 56,2 % von de Stimmen gegen Santiago Castillo von de UDP dörsett.
Dormit weer he von 1989 bet 1998 Afornten von dat Repräsentantenhuus von Belize.
He weer ünner Premierminister George Cadle Price von 1989 bet 1993 Generaalstaatsanwalt un Minister för Tourismus un Ümwelt in dat Kabinett Price II.
Schriever
1983 hett Godfrey bi Cubola Press in Benque Viejo del Carmen dat Book Ambergris Caye: Paradise With a Past rutbröcht, in dat he över de Vergangenheit von Ambergris Caye un San Pedro Town berichten deit.
1987 keem in’n sülven Verlag The Sinner’s Bossanova rut, en Romaan, in den Godfrey den Wannel in de koloniale Sellschop von Brietsch-Honduras an dat Bispeel von Eva beschrifft, en junge kreoolsche Deern, de op en Farm leevt un von dor utneiht.
- ↑ a b c d Glenn D. Godfrey & Co. LLP
