Скеча или Ксанти (грчки: Ξάνθη, Ксанти, турски: İskeçe, Искече, бугарски: Скеча) — главен град на округот Скеча и седиште на истоимената општина кои се наоѓаат во средишниот дел на областа Источна Македонија и Тракија, поточно во Западна Тракија. Старото словенско име на градот е Царево.[2]
Градот се наоѓа во средишниот дел на грчка Тракија каде што приморската рамнина преминува во брда на север. Северно од градот се наоѓаа Руен, дел од планинскиот ланец Родопи. Низ градот тече реката Врба или Скечанска (Κόσυνθος, Косинтос). На нејзиниот источен брег е сместена на селбата Самоков (Σαμακώβ, Самако) над кој се издига манстирот „Пресв. Богородица Архангелска“ (Παναγίας Αρχαγγελιώτισσα, Панагия Архангелиотиса). Помеѓу Скеча и Егејското Море, кои се оддалечени 20 км, има рамница. Климата во градот е средоземна, со топли лета и ладни зими.
Има две мислења за потеклото на грчкото име на Ксанти: според првото, градот бил именуван по ќерка на Океан и Тетија, додека според второто, бил именуван по Ксанти, една од Амазонките кои владееле со областа во минатото.