PROFILBARU.COM

Désirée Nosbusch
Désirée Nosbusch
Gebuer	14. Januar 1965; Esch-Uelzecht
Nationalitéit	Lëtzebuerg
Educatioun	Lycée Hubert-Clément
Aktivitéit	Schauspiller, Televisiounsmoderateur, Filmregisseur, Filmproduzent, Filmschauspiller
Member vun	Deutsche Filmakademie
Famill
Bestuet mat	Tom Bierbaumer
Liewenspartner(in)	Dieter Zetsche

D'Désirée Nosbusch, gebuer de 14. Januar 1965 zu Esch-Uelzecht, ass eng lëtzebuergesch Schauspillerin, Televisiounspresentatrice, Filmregisseurin a -Produzentin.

Hir Karriär

D'Désirée Nosbusch huet hir Karriär mat nëmmen 12 Joer beim däitschsproochege Radiosprogramm vun RTL ugefaangen. Do huet se Kannersendunge co-moderéiert, mä geschwë krut se eng eege Sendung (Hits von der Schulbank). Op der däitscher Televisioun huet se zesumme mam Anke Engelke eng Kannersendung an der ARD moderéiert, an am ZDF krut se geschwënn hir eegen Emissioun (Musicbox, Hits mit Désirée).

Mat 16 Joer huet d'Désirée Nosbusch hiren éischte Film (Nach Mitternacht), a gläich drop en zweeten (Der Fan) gedréit, dee fir Opreegung suergt, well de weiblechen Haaptpersonnage e Popstar, deen en unhimmelt, wuertwiertlech zum Friesse gär huet. Gläichzäiteg huet se fir Zodi an der deemools nach biderer däitscher Televisiounslandschaft gesuergt, well se sech an enger Sendung mam Bayeresche Ministerpresident Franz-Josef Strauß an d'Hoer kritt hat, an dofir mat Protestbréiwer zougeschott gouf.

Kuerz drop goung d'Désirée Nosbusch op New York an eng Schauspillschoul. 1984 koum si hannescht op Lëtzebuerg, fir do 1984 den 29. Grand Prix Eurovision de la Chanson ze moderéieren.

An de Joren duerno pendelt se tëscht Europa an Amerika hin an hier. Se spillt reegelméisseg a Filmer (Kino an Televisioun) mat (dorënner e puer vum Andy Bausch) a moderéiert, virun allem op der däitscher Tëlee, Galaen a Variétésendungen. Fir d'éischt op der Theaterbün war se 2006 bei de Ruhrfestspiller zu Recklinghausen, wou se d'Katherina am William Shakespeare sengem Kaméidistéck Der Widerspenstigen Zähmung ënner der Intendanz vum Frank Hoffmann gespillt huet.

2001, no enger Ausbildung vun e puer Joer als Regisseurin, huet si hiren éischte Kuerzfilm (Ice Cream Sundae), mat der Tippi Hedren an der Haaptroll, gedréint.

2011 huet se zesumme mat der Alexandra Hoesdorff-Rosen (deal Productions S.A.) d'Produktioun vun der Sitcom Weemseesdet a 24 Deeler fir RTL Télé Lëtzebuerg iwwerholl. Si huet selwer och eng Nieweroll, d'Francine Konsbrück, an där Serie gespillt. 2014 koum hiren Documentaire iwwer de Fernand Fox, Succès Fox, an de Kino.

Am Abrëll 2017 huet se beim däitsche Fernseesender VOX d'Moderatioun vun der Talkshow "The Story of my Life" iwwerholl, woubäi jeeweils eng prominent Koppel domat konfrontéiert gëtt, wéi se am héijen Alter géifen ausgesinn a wou dann iwwer d'Algi geschwat gëtt.

2018 krut hir Schauspillkarriär mat der Tëleesserie Bad Banks neien Opdriff, woufir si fir hir Roll mat engem Grimme-Präis (Kategorie Darstellung) ausgezeechent gouf.

D'Désirée Nosbusch war vun 1991 bis 2002 mam éisträichesche Filmkomponist Harald Kloser bestuet, mat deem se zwee Kanner (Luka Teresa-Gerda an Noah Lennon) huet. Vun 2005 bis 2013 war si mam däitsch-tierkesche Schauspiller Mehmet Kurtuluş zesummen. D'Koppel huet sech 2013 getrennt. Zanter 2018 ass si mam däitsche Kameramann Tom Bierbaumer bestuet^[1].

Si huet zu Berlin an zu Los Angeles gelieft, wunnt mëttlerweil awer nees zu Lëtzebuerg^[2].

Filmer

als Schauspillerin

Nach Mitternacht (1980) vum Wolf Gremm
Une glace avec deux boules ou je le dis à Maman (1982) vum Christian Lara
Der Fan (1982) vum Eckhart Schmidt
Sing Sing (1983) vum Sergio Corbucci
Questo e quello (1983) vum Sergio Corbucci
Good Morning Babilonia, (ënner dem Numm: Désirée Becker) (1987) vum Paolo Taviani a Vittorio Taviani
A.D.A.M. (1988) vum Herbert Ballmann
A Wopbopaloobop A Lopbamboom (1989) vum Andy Bausch
Jean Galmont, aventurier (1990) vum Alain Maline
La femme fardée (1990) vum José Pinheiro
Three Shake-a-leg Steps to Heaven (1993) vum Andy Bausch
Der Unfisch (1997) vum Robert Dornhelm
The Contaminated Man (2000) vum Anthony Hickox
Feindliche Übernahme (2001) vum Carl Schenkel
Germaine Damar - Der tanzende Stern (2011) vum Michael Wenk
Justice Dot Net (2018) vum Pol Cruchten
De Superjhemp retörns (2018) vum Félix Koch

als Regisseurin

Ice Cream Sundae (2001) (Kuerzfilm) mat der Tippi Hedren
Succès Fox (2014), en Documentaire iwwer de Fernand Fox
Poison (2024), mam Tim Roth a mat der Trine Dyrholm.

Televisioun

Tëleesfilmer a Serien (Auswiel)

Der Raub der Sabinerinnen (1983) vum Rolf von Sydow (ARD)
Morgengrauen (1983), Deel 1, 2 an 3, aus der Serie Ein Fall für zwei, ZDF
Der Glücksritter (1984) vum Hans-Jürgen Togel
Die Klette (1986) vum Herbert Ballmann
Ex und hopp - Ein böses Spiel um Liebe, Geld und Bier (1990) vum Andy Bausch
Jolly Joker (1991) vum Marco Serafini
Felipe ha gli occhi azzurri (1992) vum Gianfranco Albano
Böses Blut (1993) vum Dagmar Damek
Michele va alla guerra (1994) vum Franco Rossi
The Way to Dusty Death (1995) vum Geoffrey Reeve
Die Aktion (1996) vum Thomas Bohn
Die Sünde einer Nacht (1996 vum Michael Keusch
Mio padre è innocente (1997) vum Vincenzo Verdecchi
Opernball (1997) vum Urs Egger (SAT 1)
Amico mio 2 (1998 vum Paolo Poeti
Killer Deal (1999) vum Clay Borris
Der Mörder in meiner Nähe (2000) vum Bernd Böhlich
High Explosive (2000) vum Timothy Bond
Love Trip (2001) vum Richard Huber
Ein Albtraum von 3 1/2 Kilo (2002 vum Uwe Janson
Das Geheimnis des Lebens (2002) vum Miguel Alexandre
Spurlos - Ein Baby verschwindet (2003) vum Hans Werner
Der Vater meines Sohnes (2004) vun der Dagmar Damek
Eine Liebe in Saigon (2005) vum Uwe Janson
Das Geheimnis von St. Ambrose (2006)
Die Jäger des Ostsee-Schatzes (2007)
Der Tod meiner Schwester (2008)
Avalanche (2008)
Weemseesdet (2011)
Bad Banks (2018, 2020)
Capitani (TV-Serie, 2019) vum Christophe Wagner
Die Hexenprinzessin (2020)
Sisi (2021)

Moderatioun (Auswiel)

Grand Prix Eurovision de la Chanson (1984)
Demain c'est dimanche (France 2) (1985 an 1986)
Weltfussball-Gala (1991)
The World Sports Awards of the Century (1999)
Expo 2000 - Pop Meets Classic (ZDF) (2000)
Die goldene Kamera (2002)
Johannes Heesters - Eine Legende wird 100 (ARD) (2003)
2. Lëtzebuerger Filmpräis (2005)

Gielercher

2018: Deutsche Akademie für Fernsehen: Gewënner an der Kategorie Schauspielerin-Nebenrolle fir Bad Banks
2019: Grimme-Präis^[3]: Auszeechnung an der Kategorie Darstellung fir Bad Banks
Officer am Ordre de Mérite du Grand-Duché de Luxembourg (Promotioun 2019)^[4] - Schonn 2005 krut si den Titel "Chevalier"^[5]
2024: Mérite culturel vun der Stad Esch-Uelzecht

Soss

Am Ufank vun hirer Filmkarriär ass d'Désirée Nosbusch ë. a. als Désirée Becker, Désirée Becker-Nosbusch oder Nosbusch-Becker opgetrueden.
Am Dezember 2018 huet d'Désirée Nosbusch sech fir eng Campagne vun der Déiereschutzorganisatioun PETA (People for the Ethical Treatment of Animals) fotograféiere gelooss fir d'Konsumente vum Kaf vun exoteschem Lieder ofzehalen^[6].

Literatur

Vom Teeniestar bis „Bad Banks“, Luxemburger Wort vum 12./13. Mäerz 2022, S. 94
Désirée Nosbusch: Endlich noch nicht angekommen. Ullstein 2022, ISBN 9783550201738 (Autobiographie).