გერმანიის ცენტრისტული პარტია (გერმ. Deutsche Zentrumspartei) — გერმანიის პოლიტიკური პარტია, იყო ერთ-ერთი ყველაზე გავლენიანი პოლიტიკური პარტია გერმანიის იმპერიასა და ვაიმარის რესპუბლიკაში. ის გამოხატავდა გერმანიის მოსახლეობის კათოლიკური ნაწილის ინტერესებს. წმინდა საყდარსა და გერმანიას შორის გაფორმებული კონკორდატის პირობების თანახმად მოხდა პარტიის თვითლიკვიდაცია 1933 წელს.
მეორე მსოფლიო ომის დამთავრების შემდეგ პარტია თავიდან დაარსდა, თუმცა ვეღარ დაიბრუნა ძველი მნიშვნელობა, რადგან წევრთა უმრავლესობა ახლადდაარსებულ ქრისტიან-დემოკრატიულ კავშირს შეუერთდა. ცენტრისტული პარტია წარმოდგენილი იყო გერმანიის პარლამენტში 1957 წლამდე.