PROFILBARU.COM

The Killers
The Killers
	;
ბიოგრაფია
წარმოშობა	ლას-ვეგასი, ნევადა, აშშ
ჟანრ(ებ)ი	ალტერნატიული როკი, ინდი-როკი, ახალი ტალღა, პოსტ-პანკი, ჰარტლენდ-როკი
აქტიური	2001–დღემდე
ლეიბლ(ებ)ი	Island, Vertigo, Marrakesh, Mercury
წევრები	ბრენდონ ფლაუერსი; დეივ კენინგი; მარკ სტერმერი; რონი ვანუჩი უმცროსი
ყოფილი წევრები	დელ ნილი ; მეტ ნორკროსი ; ბრაიან ჰევენსი
საიტი	thekillersmusic.com
	The Killers ვიკისაწყობში

The Killers — ამერიკული ალტერნატიული როკ-ჯგუფი ლას-ვეგასიდან, ნევადიდან. ჩამოყალიბდა 2001 წელს. ჯგუფის შემადგენლობაში შედიან: ბრენდონ ფლაუერსი (ვოკალისტი, კლავიშისტი), დეივ კენინგი (გიტარისტი, ვოკალისტი), მარკ სტერმერი (ბას-გიტარა, ვოკალი) და რონი ვანუჩი უმცროსი (დასარტყმელი საკრავები). ჯგუფის სახელწოდება აღებულია გამოგონილი კოლექტივის ლოგოდან, რომელიც გამოჩნდა New Order-ის სიმღერის „Crystal“ მუსიკალური ვიდეოში.^[1]

ჯგუფს გამოცემული აქვს ოთხი სტუდიური ალბომი: Hot Fuss (2004), Sam's Town (2006), Day & Age (2008) და Battle Born (2012). ოთხივე მოვხდა ბრიტანეთისა და ირლანდიის რესპუბლიკის ჩარტების #1 პოზიციაზე და მსოფლიო მასშტაბით გაიყიდა დაახლოებით 22 მილიონი ასლის ოდენობით.^[2] ახალი ალბომი, Wonderful Wonderful, 2017 წელს გამოვა^[3].

2023 წლის 15 აგვისტოს, შეკვეთილში გამართული კონცერტის დროს, ჯგუფის წევრებმა სცენაზე დაპატიჟეს აუდიტორიის წევრი, რომელიც რუსი აღმოჩნდა. ბრენდონ ფლაუერსმა ქართველებსა და რუსებს „ძმები“ უწოდა, რასაც აუდიტორიის პროტესტი და დიდი ნაწილის მიერ კონცერტის დატოვება მოყვა. ჯგუფს გამოსვლის დროზე ადრე დასრულება და სცენის დატოვება მოუწია. მოგვიანებით ჯგუფმა სოციალურ ქსელში მოდიში მოიხადა.^[4]

ისტორია

2001-03 წლები, ჯგუფის შექმნა

2001 წელს ბრენდონ ფლაუერსმა დატოვა სინთპოპი ტრიო Blush Response. ჯგუფი სამუშაოდ გადადიოდა ლოს-ანჯელესში.^[5]. დამწყებმა მუსიკოსმა კი მშობლიური ქალაქის დატოვებაზე უარი განაცხადა. მას შემდეგ, რაც ფლაუერსი დაესწრო ბრიტანული ჯგუფ Oasis-ის კონცერტს ლას-ვეგასის ცნობილ სასტუმრო Hard Rock Hotel-ში, მიხვდა, რომ მისი მოწოდება იყო, მოეძებნა თანამოაზრე მუსიკოსები^[6], რათა ერთად ახალი როკ-ჯგუფი შეექმნათ. მალევე ფლაუერსმა ლას-ვეგასის გაზეთში შემთხვევით წაიკითხა 25 წლის გიტარისტის, ვინმე დეივ კენინგის განცხადება. ახალგაზრდებმა სწრაფად გაუგეს ერთმანეთს, ჰქონდათ ერთნაირი მუსიკალური გემოვნება, კენინგის ბინაში დაიწყეს სიმღერების შექმნა. იმ პერიოდში დაიწერა ჰიტი „Mr. Brightside“.

კენინგს და ფლაუერსს პირველი ცოცხალი გამოსვლა ჰქონდათ 2002 წლის იანვარში ლას-ვეგასში, კაფეში Espresso Roma. მათთან ერთად იმ დროს ასევე გამოდიოდა კიდევ ორი მუსიკოსი, დრამერი მეტ ნორკროსი და ბას-გიტარისტი დელ ნილი. ბიჭები უკრავდნენ ლას-ვეგასში და მის შემოგარენში, თან უფასოდ არიგებდნენ თავისი ნომრების დემო დისკსაც^[7]. ლას-ვეგასის საკმაოდ პატარა მუსიკალურ სამყაროში ძირითადად პანკ-როკის, ნიუ მეტალის და რეპის შემსრულებლები გამოდიოდნენ. აქ The Killers-მა მოიტანა საკუთარი უნიკალური რაფინირებული და დახვეწილი სტილი. როგორც ერთი ადგილობრივი მიმომხილველი წერდა - "საბედნიეროდ The Killers არ ჰგავს არც ერთ სხვა ჯგუფს ქალაქში" და მათ ჟღერადობას ადარებდა ბრიტანული თანამედროვე მუსიკის და ინდი-როკის ნაზავს^[8]. ჯგუფი, რომლის ჟღერადობას აგრეთვე ხშირად ახასიათებდნენ, როგორც ცვალებადს, ჯერ კიდევ ჩამოყალიბების პროცესში იყო. ზოგი შემსრულებელი ტოვებდა The Killers-ს, ზოგიც ახალი წევრი ხდებოდა.

დრამერი რონი ვანუჩი უმც. და ბასისტი მარკ სტერმერი უკვე სხვა ჯგუფების შემსრულებლები იყვნენ, როდესაც შეხვდნენ კენინგს და ფლაუერსს - უკანასკნელმა ისინი დაარწმუნა, The Killers-ში გადმოსულიყვნენ. 2002 წლის ნოემბერში ჯგუფმა დღევანდელი სახე მიიღო. ოთხი ახალგაზრდა ვანუჩის ავტოფარეხში ერთად ახალი მუსიკის იდეებზე მუშაობდა. სავარჯიშოდ ღამღამობით ხშირად ჩუმად იპარებოდნენ ლას-ვეგასის ნევადის უნივერსიტეტის სარეპეტიციო დარნბაზში. აქ რონ ვანუჩი უმც. კლასიკურ დასარტყმელ ინსრუმენტებზე დაკვრას ეუფლებოდა. სწორედ ამ დროს დაიწერა ჯგუფის სადებიუტო ალბომი Hot Fuss, მასში შესული ჰიტებით, „Somebody Told Me“ და „Smile Like You Mean It“^[9].

ახალშექმნილი ჯგუფი გამოსვლებს ლას-ვეგასის და ახლო მდებარე ქალაქების მცირე დარბაზებში განაგრძობდა. სადაც მას უკვე გამოუჩნდა პატარა, მაგრამ ერთგული თაყვანისმცემლების ჯგუფი. შეერთებული შტატების და დანარჩენ მსოფლიოს მუსიკალურ ბაზარზე გავლენიანი მულტინაციონალი მუსიკალური ლეიბლის, Warner Bros. Records-ის ახალგაზრდა დამწყებ შემსრულებლებთან მუშაობის დეპარტამენტის წარმომადგენელმა ბრეიდენ მერიკმა ინტერნეტში შემთხვევით იხილა და მოისმინა ლას-ვეგასში და მის შემოგარენში არსებული უცნობი მუსიკალური ჯგუფების საიტზე განთავსებული The Killers-ების დემო. ჯგუფის ცოცხალი შესრულების მოსმენის შემდეგ მერიკმა მათ კონტრაქტი შესთავაზა, და ამავდროულად მათი მენეჯერიც გახდა. მერიკმა ბიჭები დემოს ჩასაწერად პანკ-როკ ჯგუფ Green Day-ს ყოფილ მენეჯერ ჯეფ ზალცმანთან ერთად კალიფორნიის, თავისი ლიბერალიზმით და ხმისჩამწერილი სტუდიით განთქმულ ქალაქ ბერკლიში მიიყვანა. შემდეგ მერიკმა და ზალცმანმა დემო შეერთებული შტატების ყველა დიდ მუსიკალურ ლეიბლს გაუგზავნეს.

დარიგებულმა დემოებმა მიზანს ვერ მიაღწია. დიდი სტუდიებიდან როკ-ჯგუფს არავინ არ გამოხმაურებია. მხოლოდ Warner-მა მიიწვია ისინი ჩიკაგოს MOBfest-ზე. დამწყები შემსრულებლების ეს სამდღიანი შეკრება, სადაც ყველა დიდი და საშუალო სიძლიერის მუსიკალური ლეიბლი გზავნიდა თავის A&R დეპარტამენტის წარმომადგენლებს, რათა მოიძიონ მომავალი ვარსკვლავები, მნიშვნელოვანი იყო, როგორც გრამჩამწერი კომპანიების, ასევე ახალბედებისთვის.

მიუხედავად იმისა, რომ Warner დიდად არ აღფრთოვანებულა The Killers-ის გამოსვლით შეკრებაზე, ღონისძიებაზე აღმოჩნდა ვინმე ბრიტანელი ნაიალ ნორბარი , რომელმაც ბიჭების ხუთნომრიანი დემო სახლში წაიღო და შემდეგ ინდი-ლეიბლის, Lizard King Records-ის წარმომადგენლებს მოასმენინა. The Killers-მა 2003 წლის ივლისში კონტრაქტი გააფორმა ბრიტანულ ლეიბლთან.^[10]

2003-05 წლები, ალბომი Hot Fuss

2003 წლის 19 აგვისტოს BBC Radio 1-ზე შედგა „Mr. Brightside“ პრემიერა. The Killers გაემგზავრა ლონდონში სადაც ოთხ კონცერტს ატარებს. 2003 წლის 29 სექტემბერს დიდ ბრიტანეთში „Mr. Brightside“ შეზღუდული რაოდენობით გამოდის როგორც CD-ზე ასევე გრამფირფიტაზე. მუსიკალური კრიტიკა დადებითი შეფასებებით ხვდება ჯგუფის დებიუტს. ამერიკაში დაბრუნების შემდეგ მათ იწვევენ სხვადასხვა მუსიკალურ ღონისძიებებზე. The Killers-ით ინტერესდება ბევრი გრამჩამწერი სტუდია, საბოლოოდ ჯგუფი კონტრაქტს აფორმებს კომპანია „Island Def Jam“-თან.

2003 წლის ნოემბერში ჯეფ ზალცმანის ხელმძღვანელობით ჯგუფის წერს თავის პირველ ალბომს „Hot Fuss“. 2004 წლის ივნისში მუსიკალურ ბაზარზე ალბომს დიდ ბრიტანეთში უშვებს „Lizard King Records“, ხოლო შეერთებულ შტატებში - „Island Records“.

„Hot Fuss“-ის გამოსვლას ბევრი კრიტიკოსი დადებითად, ზოგიც აღფრთოვანებით აფასებს. ჯგუფი ხშირად დადის ტურნეებში, ხდება მოთხოვნადი. პრესტიჟული გრემის ნომინანტები ხდება სინგლები, 2005 წელს - „Somebody Told Me“; 2006 წელს კი -„Mr. Brightside“ და „All These Things That I've Done“. The Killers სადებიუტო ალბომი მნიშვნელოვანი კომერციული წარმატებით სარგებლობს. „Hot Fuss“ დიდ ბრიტანეთის ჰიტ-პარადებში 2005 წლის იანვარში პირველ ადგილზე გადის. გამოსვლიდან შვიდი თვის შემდეგ ალბომი 7-ჯერ ხდება პლატინის, როგორც დიდ ბრიტანეთში ასევე ირლანდიაში (ბრიტანული პლატინა უტოლდება 300.000 ცალ გაყიდულ CD ან/და გრამფირფიტას). შეერთებულ შტატებში ალბომი სამჯერ ხდება პლატინის (აშშ-ს პლატინა უტოლდება 1 მლნ. ცალს). ალბომი პლატინა ასევე ხდება კიდევ რამდენიმე ქვეყანაში. მონტე-კარლოში ყოველწლიურად გამართული „მსოფლიო მუსიკალური პრიზები“ (The World Music Awards) 2005 წელს The Killers ასახელებს როგორც მსოფლიოში ყველაზე გაყიდვად დებიუტანტ ჯგუფs. 2005 წელს ჯგუფი გრემის სამ ნომინაციაშიც ხვდება, მათ შორის როგორც „წლის საუკეთესო როკ-ალბომი“.

2005 წლის ივნისისთვის The Killers უკვე ამბობს თავისის სიტყვას მუსიკის სამყაროში. ჟურნალ როლინგ სტოუნის მიერაც ჯგუფი სახელდება როგორც „გასული წლის საუკეთესო გაყიდვადი ახალი როკ-ჯგუფი“. ჯგუფის წამყვანი მომღერალი ბრენდონ ფლაუერსი ცნობილი ხდება თავისი განსაკუთრებული ჩაცმის სტილით. მედიაში ხშირად ისმის მწვავე რეაქციები მის სხვადასხვა სახის გამონათქვამებზე: რწმენაზე, რელიგიაზე, სექსზე, ოჯახზე, შვილებზე, მის კოლეგებზე. ბიზნესში გავლენიანი და პოპულარული რეპერი ჯეი-ზი, 2005 წელს ჯგუფის „საუნდს“ ასე ახასიათებს, „მათ აიღეს ძველი და სრულიად ახალი ჟღერადობა მიანიჭეს“. 2005 წლის ივლისში ჯგუფი ლონდონში Live 8, საქველმოქმედო კონცერტში იღებს მონაწილეობას. სადაც მასთან ერთად გამოდიან ან მის ნომრებს ასრულებენ, როკ-ჯგუფები, ბრიტანული Coldplay, ირლანდიური U2, და გასული საუკუნის 90-იანი წლებში პოპულარული ბოიბენდის Take That-ის ვარსკვლავი რობი უილიამსი.

2005–07 წლები, ალბომები Sam's Town და Sawdust

2006 წლის 2 ოქტომბერს ჯერ დიდ ბრიტანეთში, მეორე დღეს კი შეერთებულ შტატებში გამოდის The Killers სტუდიაში ჩაწერილი რიგით მეორე ალბომი. რომლის სახელწოდება „Sam’s Town“, მოდის ლას-ვეგასის უძველესი კაზინოდან. ადგილობრივი მაცხოვრებლები „Sam’s Town“ მეტსახელადაც ეძახიან თვითონ ქალაქს. ჯგუფის თქმით, ალბომში შესული ნომრები ეძღვნება იმ ამერიკას, რომელზეც ადამიანები ოცნებობდნენ და ყოველთვის იოცნებებენ. ფლაუერსის განცხადებით, რომელიც უმეტესი სიმღერების ტექსტის ავტორიც არის, „მინდოდა შემექმნა ალბომი, რომელიც აჩვენებდა ყველაფერ მნიშვნელოვანს, რამაც დღემდე მომიყვანა.“ ამ დროისთვის მთელ მსოფლიოში გაყიდულია ალბომის დაახლოებით 8 მლნ. ეგზემპლარი.

ნიდერლანდელი ფოტოგრაფი, რეჟისორი ანტონ კორბეინი მხატვრულად აფორმებს ალბომს. მისი თქმით ალბომის ყდისთვის The Killers უნდოდა „ელეგანტური და ბოშური იმიჯი“. ალბომი უკვე გამოსვლის კვირას იყიდება 315,000 ცალი და შეერთებულ შტატებში იკავებს მეორე ადგილს ბილბორდის ჰიტ-პარადის ჩამონათვალში. „Sam's Town“ ხდება „პლატინა“ აშშ, დიდი ბრიტანეთს, ავსტრალია, კანადა, არგენტინასა და ირლანდიაში. ალბომში შესული ნომრები კვლავ ჰიტტდება, განსაკუთრებით „When You Were Young“. „Sam's Town“ ასევე ხვდება გრემის ნომინაციებში.

2009 წლის დეკემბერში მუსიკის სფეროში პოპულარული ყოველთვიური გამოცემა როლინგ სტოუნის მიერ ჩატარებულ გამოკითხვაში, ჟურნალის მკითხველის აზრით „Sam's Town“ გასული ათწლეულის ყველაზე დაუფასებელი ალბომია.

2007 წლის 9 ნოემბერს Vertigo Records-მა გამოუშვა ჯგუფის კომპილაციური ალბომი Sawdust. ალბომი შედგება ორი სინგლის, B-მხარისგან, 2002 და 2007 წლებში ჩაწერილი რემიქსების და ქავერებისგან. Sawdust-ის შექმნაზე დიდი გავლენა იქონია როკ-ჯგუფების Oasis, The Smiths, The Smashing Pumpkins, ნირვანას სხვადასხვა დროს გამოცემულმა სინგლების B-მხარემ.

2007 წლის თებერვალში ტიმ ბარტონმა გადაიღო თავისი პირველი კლიპი „Bones“. ჯგუფის ამ ვიდეომ კრიტიკის აღიარება პოვა, ასევე გაიმარჯვა ბრიტანული NME Awards-ზე „საუკეთესო მუსიკალური კლიპი ნომინაციაში“. ალბომის პირველი სინგლი „Tranquilize“ რომელიც შეიქმნა Lou Reedისს თანამშრომლობით, გამოვიდა 2007 წლის ოქტომბერში.

ალბომში ასევე შევიდა ინგლისური პოსტ-პანკ ჯგუფ Joy Division-ის „Shadowplay“ ქავერი. ეს ქავერი შემდეგ ანტონ კორბეინმა გამოიყენა თავისი ბიოგრაფიული ფილმისთვის „Control“ (2007), ამ ინგლისური ჯგუფის წამყვან ვოკალისტის იან კერტისის ტრაგიკულ ცხოვრებაზე.

ალბომის გამოსვლიდან პირველ კვირას გაიყიდა 82.000 ეგზემპლიარი, აშშ-ს ბილბორდის 200 საუკეთესო ალბომებში დაიკავა 12 ადგილი. მეორე იყო iTunes ჩარტებში, სადაც პირველობა მხოლოდ Alicia Keys ჰიტ-ალბომს „As I Am“ დაუთმო. დღეისთვის მსოფლიო მასშტაბით გაყიდულია ალბომის 1 მლნ. ეგზემპლიარი.

2007-2011 წლები, ალბომი Day & Age

მესამე სტუდიის ალბომის ჩასაწერად The Killers თანადგომისთვის მიმართავს ელექტრონულ მუსიკოსს ბრიტანელ სტიუარტ პრაისს. „Day & Age“ გამოვიდა 2008 წლის 25 ნოემბერს დიდ ბრიტანეთს, კანადასა და შეერთებულ შტატებში. ჯგუფის წამყვნამა ვოკალისტმა ბრენდონ ფლაუერსმა განაცხადა რომ ალბომი ჯგუფის „ყველაზე მხიარული ჩანაწერია“. დღეისათვის მსოფლიოში გაყიდულია ალბომის 3 მლნ. ეგზემპლარი. „Day & Age“ გამოსვლის შემდეგ ჯგუფმა მოუაწყო წარმატებული მსოფლიო ტური.

ახალი ალბომისთვის ნომრების ჩაწერა ჯგუფმა „Sam's Town“-ის ტურის დროს დაიწყო. ისე რომ ერთმანეთს არ იცნობდნენ, პრაისს უკვე ჰქონდა The Killers რამდენიმე რემიქსი გაკეთებული. მათი პირველი შეხვედრა გაიმართა ერთობლივ ვახშამზე 2006 წელს ლონდონში. რის შემდეგ ერთად პრაისის საკუთარ ხმისჩამწერ სტუდიაში ორ საათში ჩაწერეს „Human“. ნომერი გამოვიდა 2008 წლის ოქტომბერში და კრიტიკის მხრიდან საკმაოდ კარგად იყო მიღებული, ნომერი ასევე სწრაფად ხდება პოპულარული.

„Day & Age“ იკავებს პირველ ადგილს დიდი ბრიტანეთის და ირლანდიის ჰიტ-პარადებში, ასევე მეექვსე ადგილს „Billboard 200“ ალბომის ჩარტში. ამავე ქვეყნებში 4-ჯერ ხდება პლატინა.

2010 წლის იანვარში ჯგუფმა განაცხადა, რომ ექვსი წელი ხშირი გასტროლების შემდეგ, მიიღეს გადაწყვეტილება შესვენების აღების შესახებ. რაც დაახლოებით წელიწადნახევარი გაგრძელდა.

2011-13 წლები, დაბრუნება და ალბომი Battle Born

2011 წლის 2 აპრილს ჩილეს დედაქალაქ სანტიაგოში Lollapalooza ფესტივალზე გამოსვლით The Killers კვლავ დაუბრუნდა აქტიურ მუსიკალურ მოღვაწეობას. რის შემდეგაც ჯგუფი ასევე გამოდიოდა სხვადასხვა ფესტივალებზე თუ ივენთებზე ავსტრიაში, ლონდონის ჰაიდ პარკში, ორლანდოში ფესტივალზე „Orlando Calling“.

2012 წლის 23 აპრილს ჯგუფის შემოქმედების აქტიური თანამონაწილე 33 წლის საქსოფონისტი ტომი მარტი (Tommy Marth) ცეცხლსასროლი იარაღით მიყენებული ჭრილობის შედეგად ლას-ვეგასში საკუთარ სახლში ნახეს გარდაცვლილი. პოლიციის ოფიციალური ვერსიით საქმე ეხებოდა თვითმკვლელობას.

2012 წლის ივნისში The Killers ოფიციალურ VEVO გვერდზე აიტვირთა რიგით მეოთხე ალბომის „Battle Born“ ტრეილერი. ალბომის სახელწოდება მოდის შტატ ნევადას დროშის ოფიციალური სახელწოდებიდან.

„The Killers“ სტუდიაში ჩაწერილი მეოთხე ალბომი „Battle Born“ გამოვიდა 2012 წლის 18 სექტემბერს. ეს „The Killers“ ზედიზედ მეოთხე ალბომია, რომელიც დიდ ბრიტანეთსა და ირლანდიაში ალბომების ჩარტებში პირველ ადგილს იკავებს. ალბომი მალევე ხდება „პლატინა“ გაერთიანებულ სამეფოშში, და „ოქრო“ ირლანდია, მექსიკასა და ავსტრალიაში.

ჯგუფის ახალმა ტურნემ, „Battle Born World Tour“ დაადასტურა რომ ისინი ფართო პოპულარობით სარგებლობენ მთელ მსოფლიოში. „The Killers“ ასევე ჰქონდა გამოსვლები ჩინეთსა და რუსეთში. 2013 წლის 22 ივნისს ჯგუფმა მოაწყო თავისი ყველაზე დიდი შოუ, 90.000 მაყურებლით, ლონდონის სახელგანთქმულ უემბლის სტადიონზე. სადაც შეასრულა ამ გამოსვლისთვის სპეციალურად შექმნილი ნომერი. პრესა უემბლის კონცერს ძალიან დადებითად გამოეხმაურა.

„The Killers“ ახალი ალბომის ნომრებით კვლავ დიდი წარმატებით გამოვიდა სხვადასხვა ფესტივალებზე ევროპაში, ავსტრალიაში, სამხრეთ და ჩრდილოეთ ამერიკაში. 2013 წლის ოქტომბერში, მშობლიურ ქალაქში ახალ ფესტივალზე, „Life Is Beautiful“ გამოსვლით ჯგუფმა ოფიციალურად დახურა „Battle Born World Tour“.

2013 წლიდან დღემდე, Direct Hits და მეხუთე ალბომი

2013 წლის 11 სექტემბერს ჯგუფმა დატვიტა ფოტო, რაზეც მორზეს ანბანის ხუთი სტროფია გამოსახული, და შემდეგნაირად ითარგმნება „The Killers Shot at the Night“. 2013 წლის 16 სექტემბერს, ლონდონში გამართული მათი პირველი შოუს ზუსტად ათი წლის შემდეგ „The Killers“ გამოუშვა ახალი სიმღერა, „Shot at the Night“. სიმღერა შევიდა ჯგუფის მეორე კომპილაციურ ალბომში „Direct Hits“, რომელიც გამოვიდა 2013 წლის 11 ნოემბერს. ალბომში შესულია ჯგუფის ყველა პოპულარული ნომერი. და კიდევ ერთი ახალი სიმღერა „Just Another Girl“.

ალბომის გამოსვლას მოჰყვა მცირე სარეკლამო ტური. 2014 წელს ჯგუფი ასევე გამოვიდა რამდენიმე ფესტივალზე. შემდეგ The Killers განაცხადეს, რომ შემდგომ, მეხუთე ალბომზე მუშაობის დაწყებამდე იღებენ ხანგრძლივ შესვენებას.

ხმისჩამწერი სტუდია და სოლო კარიერა

2008 წლიდან The Killers შტატ ნევადას განსაკუთრებული სტატუსის მქონე ქალაქ უინჩესტერში ფლობს და მართავს გრამჩამწერ სტუდია „Battle Born Studios“ (ყოფილი „Studio Vegas“).

2010 წელს ბრენდონ ფლაუერსი უშვებს ალბომ, Flamingo. უკვე დაგეგმილია 2015 წელს მისი მეორე სოლო ალბომის გამოშვება.
რონი ვანუჩის ახალი მუსიკალური პროექტი „Big Talk“ 2011 წელს უშვებს პირველ ალბომს იგივე სახელწოდებით „Big Talk“.
მარკ სტერმერი 2011 წელს უშვებს ალბომს „Another Life“. სტერმერი ასევე არის ავსტრალიური როკ-ბენდ „Howling Bells“ ალბომის „The Loudest Engine“ (2011) პროდიუსერი.

მუსიკალური სტილი

ითვლება რომ The Killers ასრულებს სხვადასხვა ჟანრის მუსიკალურ კომპოზიციებს, როგორიცაა: ალტერნატიული როკი, ინდი-როკი, პოსტ-პანკ რივაივლ, ნიუ-უეივ, ჰართლენდ-როკი.

ჯგუფის წევრები

მოქმედი წევრები

ბრენდონ ფლაუერსი - ვოკალი, კლავიშებიანი საკრავები ^[11], აკუსტიკური ბასი (2001 -დღემდე)
დეივ კენინგი - გიტარა, ვოკალი (2001 -დღემდე)
მარკ სტერმერი - ბას-გიტარა, ვოკალი (2002 -დღემდე)
რონი ვანუჩი უმც. - დასარტყმელი საკრავები ინსტრუმენტები (2002 - დღემდე)

ტურნეს დროს

ბობი ლი პარკერი - გიტარა (2008 -დღემდე)
ტედ საბლეი - კლავიშებიანი საკრავები, გიტარა, ბეკ-ვოკალი (2006-2007 წლები, 2011 - დღემდე)
ჯეიკ ბლენტონი - კლავიშებიანი საკრავები, გიტარა, ბეკ-ვოკალი (2011 - დღემდე)
რობ უაიტიდი - დასარტყმელი საკრავები (2006 - დღემდე)