PROFILBARU.COM

Sólmyrkvinn 12. ágúst 2026 verður almyrkvi á sólu sem gengur yfir Norðurslóðir, austanvert Grænland, Ísland, Atlantshaf og Spán. Almyrkvi verður þegar tunglið gengur á milli jarðarinnar og sólar þannig að það hylur algerlega sólina frá jörðu séð. Myrkvinn verður í hámarki yfir hafinu skammt vestan Látrabjargs kl. 17:45.53. Almyrkvinn verður sá fyrsti sem sést frá Íslandi síðan almyrkvi gekk yfir meðfram suðurströndinn 30. júní 1954 en næsti almyrkvi sem gengur yfir Ísland verður ekki fyrr en árið 2196.^[1] Almyrkvinn gengur svo yfir Atlantshaf og nær aftur landi á Spáni þar sem hann gengur þvert yfir landið norðanvert til Miðjarðarhafs og yfir Baleareyjar. Almyrkvi á sólu sást síðast á Spáni 30. ágúst 1905. Sólmyrkvinn sést sem deildarmyrkvi sem hylur hluta af sólinni í Evrópu, Norður-Afríku og Norður-Ameríku. Deildarmyrkvinn hylur meira en 90% af sólinni á þeim hlutum Íslands og Spánar sem almykrvinn gengur ekki yfir og einnig á Grænlandi, Færeyjum, Bretlandseyjum, Portúgal, N-Afríku við Miðjarðarhaf, Frakklandi, Sviss, Ítalíu og Balkanskaga.

Á Íslandi gengur almyrkvinn yfir Vestfirði, Snæfellsnes, Mýrar, Reykjavík og Suðurnes. Hámark myrkvans gengur eftir línu í hafinu vestur af landinu og lengd hans verður meiri eftir því sem farið er nær þeirri línu. Á Látrabjargi stendur almyrkvinn í 2 mínútur og 13 sekúndur en eina mínútu í Reykjavík þar sem hann hefst 17:48. Utan þess svæðis sem almyrkvinn gengur yfir verður deildarmyrkvi sem hylur t.d. 97,9% af sólinni á Akureyri og 95,2% í Neskaupstað.

**Sólmyrkvinn 12. ágúst 2026**
Staður	Land	Upphaf deildarmyrkva	Upphaf almyrkva	Lok almyrkva	Lok deildarmykrva	Lengd almyrkva	Stærð
Ísafjörður	Ísland	16:43:17	17:44:06	17:45:37	18:43:56	1m 31s	1.005
Látrabjarg	Ísland	16:43:39	17:44:28	17:46:41	18:44:55	2m 13s	1.014
Ólafsvík	Ísland	16:45:05	17:45:53	17:47:57	18:46:07	2m 3s	1.011
Borgarnes	Ísland	16:46:30	17:47:40	17:48:23	18:46:53	43s	1.001
Akranes	Ísland	16:46:49	17:47:51	17:48:57	18:47:17	1m 6s	1.002
Reykjavík (Lækjartorg)	Ísland	16:47:12	17:48:16	17:49:15	18:47:37	59s	1.002
Mosfellsbær	Ísland	16:47:16	17:48:32	17:49:02	18:47:35	30s	1.000
Sandgerði	Ísland	16:47:03	17:47:54	17:49:39	18:47:47	1m 45s	1.007
La Coruña	Spánn	19:30:52	20:27:37	20:28:51	21:21:55	1m 14s	1.004
Bilbao	Spánn	19:31:43	20:27:17	20:27:49	sólsetur 21:19	32s	1.001
Zaragoza	Spánn	19:34:36	20:28:57	20:30:22	sólsetur 21:08	1m 25s	1.007
Palma de Mallorca	Spánn	19:37:59	20:31:00	20:32:36	sólsetur 20:49	1m 36s	1.015