Lárus Pálsson leikari les ljóð er 33 snúninga LP hljómplata gefin út af SG - hljómplötum árið 1976. Á henni flytur Lárus Pálsson leikari ljóð eftir íslensk ljóðskáld. Einnig flytur Lárus þætti úr leikritunum um Hamlet danaprins og hinn norska Pétur Gaut.
Í leik og leikstjórn tókst Lárus á hendur ýmis hin erfiðustu viðfangsefni leikhússins, en hlutverk hans og leiksigrar vitna um fjölhæfni og dýpt. Meðal hinna eftirminnilegustu voru Jón Grindvíkingur í Íslandsklukkunni (Halldór Laxness), Argan í Ímyndunarveikinni (Molière), Óvinurinn í Gullna hliðinu (Davíð Stefánsson) og titilhlutverkin Pétur Gautur (Henrik Ibsen) og Hamlet (William Shakespeare). Lárus var jafnvígur á gleðileik og harmleik. en hæst reis list hans í ljóðrænni túlkun og náði þar sérstöðu. Ljóðskynjun hans virtist dýpri og ríkari en annarra og framsögn hans, mjúk eða sterk, auðug eða einföld, nálgaðist einatt þá fullkomnun að öll önnur umfjöllun textans virtist út i hött.
Efni þessarar upptöku er úrval þess sem Lárus lét eftir sig, m.a í fórum Ríkisútvarpsins. Enda þótt tilviljun hafi ráðið nokkru um geymd felst í því markverð heimild um list hans.
Ég dáði hinn frábæra listamann Lárus Pálsson mjög og tel það heiður fyrir mig að flutningur hans skuli vera á þessari hundruðustu plötu fyrirtækisins. Hér er um að ræða hljóðritanir úr safni Ríkisútvarpsins og spanna þær yfir 25 ár. Þær elztu frá 1942 og því misjafnar að gæðum.
Ríkisútvarpið veitti góðfúslega leyfi sitt fyrir útgáfunni og ber að þakka Knúti Skeggjasyni tæknimanni og segulbandaverði útvarpsins fyrir gott starf við afritanir.
Þá ber einnig að þakka Óskari Halldórssyni, lektor. sem valdi efnið úr safni útvarpsins og raðaði niður. Síðast en ekki sízt þakka ég Maríu Jóhönnu, dóttur Lárusar Pálssonar, og Hólmfríði systur hans, sem áttu sinn stóra þátt í því að af útgáfu þessari varð.