Դարիա Կամսարական

Անվան այլ կիրառումների համար տե՛ս՝ Կամսարական (այլ կիրառումներ)

Դարիա Կամսարական Դարուհի Կամսարական
Ծնվել է	ապրիլի 24, 1902(1902-04-24)
Ծննդավայր	Ալեքսանդրիա, Եգիպտոս[1]
Մահացել է	մարտի 1, 1986(1986-03-01)[2] (83 տարեկան)
Վախճանի վայրը	Փարիզի 14-րդ շրջան, Փարիզ
Քաղաքացիություն	Եգիպտոս և  Ֆրանսիա
Ազգություն	հայ
Կրթություն	Lycée Français d'Alexandrie? (1924) և Գրան–Շոմիե ակադեմիա (1927)[1]
Ուսուցիչ	Էլպիս Կեսարացյան և Էմիլ Անտուան Բուրդել[1]
Մասնագիտություն	քանդակագործ, գրող և մեդալագործ
Daria Gamsaragan Վիքիպահեստում

Դարիա (Դարուհի) Գրիգորի Կամսարական (ապրիլի 24, 1902(1902-04-24), Ալեքսանդրիա, Եգիպտոս^[1] - մարտի 1, 1986(1986-03-01)^[2], Փարիզի 14-րդ շրջան, Փարիզ), հայ, ֆրանսագիր վիպասանուհի, քանդակագործ։

Կենսագրություն

Ծնվել է Եգիպտոսի Ալեքսանդրիա քաղաքում։ Տիգրան Կամսարականի եղբոր աղջիկն է։

Կրթությունն ստացել է ֆրանսիական դպրոցում։ Հայերեն սովորել է հայտնի մանկավարժ Էլպիս Կեսարացյանից։ Երիտասարդ հասակից հետևել է գրականության։ Ականատես լինելով Մուսա լեռան խիզախ մարտիկների կյանքին Պորտ Սաիդում, գրել է «Արյան ճակատագրականությանը» ֆրանսերեն վիպակը, որը լույս է տեսել նաև հայերեն, Կահիրեի «Արև» օրաթերթում, Միքայել Կյուրճյանի թարգմանությամբ։

1920-ական թվականների կեսերին մեկնել է Փարիզ, սովորել Փարիզի Գրան Շոմիեր ակադեմիայում, աշակերտելով Անտուան Բուրդելին։ 1935 թվականին Փարիզում կազմակերպվել է նրա անհատական առաջին ցուցահանդեսը, որն իր վրա է հրավիրել ֆրանսիական մամուլի ուշադրությունը։ Հետագայում ցուցահանդեսներ է կազմակերպել տարբեր պատկերասրահներում։ Նրա քանդակներից մի քանիսը արժանի տեղ են գրավում Փարիզի արդիական արվեստի թանգարանում, ինչպես և Եգիպտոսի թանգարաններում։ Մեծ հետաքրքրություն են առաջացրել մասնավորապես նրա 1952 և 1958 թվականների ցուցահանդեսները։

Աչքի ընկնող քանդակներից են Սաշա Պիտոևի, Շառլ Էթիենի, Ռոժե Վայանի, Ժան Ֆոլզենի և այլոց կիսանդրիները, «Ողջույն խախաղության» քանդակը և այլն։ Հեղինակ է «Ճամփորդություն արվեստի հետ» (1957, ֆրանսերեն) վեպի։ 1965 թվականին Փարիզում լույս է տեսել նրա «Հրեղեն օղակ» ֆրանսերեն վեպը։ Գրական անունն է «Անն Սարակ»։ Դարիա Կամսարականը Ֆրանսիայի Դիմադրության շարժման մասնակից է։

Եղել է նաև Հայաստանում։

Ծանոթագրություններ

1. Հայկական սովետական հանրագիտարան (հայ.) / Վ. Համբարձումյան, Կ. Խուդավերդյան — Հայկական հանրագիտարան հրատարակչություն, 1974.
2. Gamsaragan, Daria // Benezit Dictionary of Artists — OUP, 2017. — ISBN 978-0-19-977378-7 — doi:10.1093/BENZ/9780199773787.ARTICLE.B00070369

Վիքիպահեստն ունի նյութեր, որոնք վերաբերում են «Դարիա Կամսարական» հոդվածին։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 5, էջ 214)։